WANPELA anti-domestik vailens grup long Rarotonga, Cook Ailan i nau lukim planti moa lain i save kamapim vailens long haus I kam long ol long kisim helpim.

Punanga Tauturu em wanpela grup we i save wok wantaim ol lain i stap wantaim hevi bilong domestik vailens.

Dispela grup i tok nau ol i helpim moa ol man husat i kam long kisim helpim long ol na ol i stat long wari olsem ol i no kisim helpim hariap na ol i save go hariap long kot. Namba bilong ol meri i kam long kisim helpim long ol em i daunbilo.

Punanga Tauturu i mekim wok bilong pinisim vailens long ol meri moa long 20 yia pinis.

Kodineta bilong grup Rebekah Buchanan i tok hevi nau em i no gat ol helpim i stap long banisim ol famili long Cook Ailan long abyus taim ol i stat liklik yet.

Buchanan i tok, “Moa man nau i wok long kam long mipela long kisim helpim. Ol namba i soim olsem planti taim mipela i save lukim planti moa meri i kam tasol insait long las sikis mun dispela i senis. Mipela i no inap go het yet long mekim dispela wok sapos namba bilong ol man i kam long kisim helpim bilong mipela i go antap.”

Insait long las foapela yia Punanga Tauturu i helpim pinis 140 man na meri tasol dispela em i namba wan taim namba bilong ol meri i go daun long 28 long 2020 na 9-pela tasol long dispela yia.