WANTAIM moa long 2.7 milien infeksen bilong COVID-19 na long las wik 50,000 keis i kamap long wanpela de tasol, na dispela i mekim Indonesia i kamap nupela namel ples stret bilong COVID-19 long Esia rijon.

Dispela nupela Delta Variant i go het yet na bagarapim dispela kantri na Indonesia i lukluk long bungim wanpela bikpela kraisis tru.

Ol nius i kam long BBC i stori long wanpela man bilong was long paia (Paia Paita). Nem bilong em Wirawan. Nau em i no was long paia. Em i karim wok bilong lukautim ol bodi bilong ol pipel i dai long COVID-19.

Stat long las yia i kam em na 7-pela arapela wanwok bilong em i werim ful PPE gia i wok long apim ol bodi bilong ol daiman long ol haus bilong ol na karim i go, stretim ol dispela bodi pastaim na bihain bringim i go na planim ol.

Wirawan i stori olsem planti dispela ol lain husat i dai, i stap ol yet na indai. Nogat famili lain i stap wantaim ol.

Em i tok, “Ating ol i no inap kisim marasin hariap o haus sik i salim ol i go bek.

Planti taim ol neiba i save ringim mipela na tok, mipela i no lukim dispela man o meri long taim bilong self-aisolesen. Na bihain ol i save harim olsem dispela ol lain i dai pinis.

“Em ol kain keis olsem mipela i lukim olgeta de,” Wirawan i tok.

Pastaim long sik COVID-19 i wilwilim ol gen Wirawan i tok em i save redim tupela o tripela funeral long wanpela de. Nau em i kisim ol singaut long 24 funeral olgeta long wanpela de. Em i planti funeral tru long wanpela i ken holim.

Dispela kalap o bikhet bilong COVID-19 i kamap bihain long klostu 1.5 milien pipel i bikhet na i no bihainim ol tambu bilong trevol na go long Eid Holide long mun Me.

Na tu Indonesia i no putim tambu long ol intenesenel lain long go insait long kantri. Ol oda bilong en long kwarentin i no tait na bihain long namba bilong COVID-19 i kalap em i apim namba bilong kwarentin de long faiv (5) i go long eit (8).

Valdya Baraputri i raitim