PLANTI handret saientis, na ol kolisen bilong ol sios, ol envairomentalis na NGO i singaut long stopim olgeta wok bilong maining long bet bilong solwara bihainim wanpela politikel muv we i ken opim rot bilong en long Pasifik insait long tupela yia.

Dispela wik dip solwara maining sekta i kisim tok orait long go het wantaim maining long Pasifik stat long 2023 bihain long Nauru i putim wanpela rul bilong tupela yia long Intenesenel Sibed Atoriti (ISA).

ISA, i gat wok long mekim ol lo bilong givim stia long wok bilong sibed maining, i tok Nauru i kamapim wanpela hap tok o clause we bai I opim dua bilong maining long stat insait long tupela yia insait long Eksklusiv Ekonomik Zon bilong en.

Tasol, sampela i pret dispela muv bai i opim dua bilong olgeta arapela sibed maining wok long kamap.

Nau ol Pasifik grup i singaut long Nauru long tingim gen dispela muv bilong en.

Kodineta bilong Pacific Network on Globalisation Maureen Penjueli i tok i gat planti wari olsem dispela indastri bai i yusim tasol Pasifik rijon na bikpela bagarap i ken kamap.

“I nogat ol klia lo na regulesen i stap long was long dispela wok we Nauru i kamapim na ol wari i kamap long sait bilong saiens, mipela i singaut long stopim na pinisim olgeta wok bilong sibed maining long dispela taim, na yumi ken traim long stretim ol gavanens sistem,” Penjueli i tok.

Ol sivil sosaiti netwok i tok i gat planti samting i no klia yet long kain nupela maining proses na dispela i ken bagarapim ol ples na envairomen olgeta sapos yumi larim dispela projek i go het.