OL papagraun long Wes Kos bilong Santo Island long Vanuatu i tokaut long wari bilong ol nogut dispela kampani Vanuatu Forest Industry Limited, bai go na katim daun ol gutpela bikbus bilong ol.

Ol i bin rejisterim dispela kampani long Vanuatu long 2019 olsem wanpela egrikalsa, forestri na fishing kampani. Em i gat tupela dairekta, na man husat i gat bikpela sea em i wanpela sitisen bilong Saina.

NGO grup em ol i kolim Santo Sunset Environment Network i tok olsem sampela papa graun i sainim pinis kontrak wantaim dispela kampani maski sapos ol i no save gut long mining bilong dispela wok.

ABC i lukim pinis kopi bilong dispela kontrak na em i soim ol tok promis olsem dispela kampani bai bildim wanpela rot bilong ol lokal komyuniti na tu em bai givim ol sola pawa.

Tasol kontrak ya i givim tu kampani rait long katim daun ol diwai we bai ol i bildim dispela rot na ol i askim ol papa graun long no ken kisim o salim ol diwai.

Allan Taman, Siaman bilong Santo Sunset Environment Network i tok ol bikbus na enviromen bilong ol em i impoten tumas long ol pasin tumbuna na tu long gutpela sidaun na helt bilong ol.

Samuel Kenneth, em i wok olsem Eria Edministreta bilong West Coast Santo na i tok em i sapotim tingting bilong ol pipel bilong en.

Sampela komyuniti lida wantaim tu Mista Kenneth i bin holim miting wantaim ol gavman opisa bilong Sanma provinsal gavman long dispela wik we ol i bin toktok long dispela wari bilong ol pipel bilong Wes Santo.

Mipela I bin stori tu wantaim Albert Ruddley, Sekreteri Jeneral bilong Sanma provins bai yu harim long odio.

Mipela i bin traim long toktok wantaim Vanuatu Forest Industry Limited kampani, na ol i no bin laik mekim wanpela toktok long dispela wari na mipela i bin traim long kisim tingting bilong Dipatmen bilong Forest tasol mipela i no bin inap toktok wantaim ol tu.

Carolyne Tiriman i raitim