WANPELA lidameri bilong Bogenvil i tok em i gutpela long Papua Niugini na Atonomus Bogenvil Gavman i makim taim we bai ol i mekim disisen long politikel setelmen bilong Bogenvil.

Agrimen long join konsaltesen ol i holim long Wabag long Enga provins we Praim Minista James Marape na ABG Presiden Ishmael Toroama i bin sainim las wik i gat wanpela taim namel long 2025 na 2027.

Stetmen em i no tok long em taim we Bogenvil bai kamap independen, em i tok tasol long politikel setelmen long bihaintaim bilong Bogenvil.

Deputi Spika bilong ABG long bipo na memba makim ol meri long Not Bogenvil, Francesca Semoso i wanbel long dispela taim ol makim, tasol em i tok tupela gavman wantaim i mas mekim klia bilong wanem tru dispela konsaltesen long kantri olgeta long sait bilong Bogenvil bai ol i mas karimaut tu.

Mis Semoso i tok em i no save bilong wanem na bai ol pipel bilong ol narapela hap bilong Papua Niugini i mas gat toktok tu long politikel wokabaut bilong Bogenvil, long wanem autkam bilong 2019 referendum i soim klia pinis olsem ol pipel bilong Bogenvil i laikim independens.

Em i tok tu olsem, maski hau ol memba bilong PNG palamen i vot long autkam bilong referendum, ol pipel bilong Bogenvil i tokaut pinis long laik bilong ol long kisim independens na i nogat wanpela samting bai senisim dispela.

Sam Seke i raitim