Autonomous Bougainville palament bai em holim wanpela spesol sitting tumora blong givim respect long wanpela lidaman blong Bougainville, Raymond Masono husat ibin dai pinis long Friday.

Plan istap tu blong givim em wanpela state funeral long Buka pastaim long gavman isalim bodi blongen igo bek long peles blongen long Carterets blong ol planim.

Late Masono ibin memba blong Atolls long ABG na Minista blong Health na Climate Change taim em i dai long Buka hospital bihain em ibin sik.

Pastaim longen, em ibin Vice President blong ABG long gavman blong President John Momis, ABG Administrator na CEO blong Buka long longpela taim.

Wanpela Bougainville bisnisman husait ibin holim tu ol bikpela wok long Bougainville gavman, Nick Paniai itok em isave long late Masono insait 30 yiar olsem wanpela "loyal servant" insait long na public service wok blongen...na em i wanpela "highly disciplined" man.

Ol pikinini blong Mr Masono tu i lukim em olsem em wanpela gutpela papa we em ilaik long ol imas bihainim ol gutpela pasin, na maski em ibin sik, em isave tingting bik long wok blongen.

Fespla pikinini blongen, Amanda Masono em i nau memba blong ABG palament makim ol meri blong North Bougainville itok family na wan pisin long Carterets i sori tru long lusim papa blong ol.