Long Hasan Sadikin hospital long Bandung siti, Lazuardhi Dwipa, i lukim olsem moa pipel i wok long kamap long imejensi dipatmen long las mun.

"Pastaim samting olsem 10-pela pipel i kam long wanpela de na bihain mak i go antap long 20 pipel na nau, moa long 30 pipel i save kam," Dr Dwipa i tokim ABC.

Long dispela wik, moa long 160 bet em ol COVID-19 keis. Haus sik i gat 224 bet bilong ol sikman.

Namba bilong ol lain i kisim COVID-19 i wok long pulapim ol haus sik long Indonesia bihain long Eid holide.(Reuters: Willy Kurniawan)

"Bihain long Eid holide, ol haus sik i lukim planti moa manmeri husat i kisim COVID-19 na i no ol lapun tasol olsem bipo," Dr Dwipa i tok.

"Mipela i lukim ol yangpela manmeri husat i gat 30 krismas samting na husat i bin kisim ful veksinesen, i kisim COVID-19 na ol i kam long haus sik."

Planti pipel bilong Indonesia i kisim Sinovac veksin bilong Saina. Dispela veksin i no gat bikpela strong olsem ol arapela COVID-19 veksin.

Reuters nius ejensi i ripot olsem moa long 350 dokta na ol helt woka bilong Indonesia i bin kisim COVID-19 na sampela i slip long haus sik, maski sapos ol i bin kisim Sinovac veksin pinis.

Wanpela NGO grup husat is ace ripot long platfom Lapor COVID-19, i tok long taim pandemic i bin stat i kam inap nau, moa long 945 medikol woka i dai pinis long COVID-19.

Em i wanpela mun bihain long bikpela holide bilong ol Muslim ol i kolim Eid al-Fitr. Na long planti hap bilong Indonesia ol i lukim moa pipel i wok long kisim COVID-19 na ol haus sik i pulap nau. Indonesia em i bikpela Muslim kantri tru long wol.