LONG taim COVID-19 i bin kamap long Indonesia las yia, Dokta Ike Sri Redjeki i bin luksave long wanpela bikpela nid tru long ol haus sik.  

• Indonesia i lukim planti moa pipel i kisim COVID-19 bihain long bikpela holide bilong ol Muslim ol i kolim Eid.
• Planti pipel i bilip olsem coronavirus em i wanpela giaman stori bilong pretim ol pipel.
• COVID-19 i kilim planti handet helt woka long Indonesia.

Dokta Ike Sri Redjeki i bin wanpela bilong ol lain dokta husat i wokim wanpela low kost ventileta ol i kolim Vent-I, long taim ol haus sik long Indonesia i bin sot tru long ol ventileta bilong helpim ol pipel i kisim COVID-19. 

Tasol long dispela wik taim moa pipel i wok long kisim COVID-19, Dokta Redjeki i dai long taim em i kisim COVID-19. Em i bin kisim veksinesen bilong dispela sik tasol sik i bin kilim em.

"Dispela dokta i bin gat aidia bilong wokim wanpela ventileta bilong helpim ol haus sik long taim ol ventileta i bin sot tru," Reza Widianto Sujud, wanpela wanwok bilong em i tok.

"Taim i bin sot na mipela i nidim ventileta i isi long ol lain i ken yusim."

Narapela wanwok, Eri Surahman, i tok em i wok wantaim Dokta Redjeki long moa long 30 yia na em i tok Dokta Redjeki wanpela gutpela tisa..

"Mipela i sori tru na mipela i paul bikos i no gat narapela bai inap kisim ples bilong em," em i tok.

Dr Redjeki wanpela bilong ol tausen manmeri long Indonesia, COVID-19 i wok long kilim long olgeta mun.