PRAIM MINISTA bilong Vanuatu, Bob Loughman, i bin namba wan man bilong kantri long kisim Sinopharm veksin bilong Saina long dispela wik. Tasol AstraZenecca veksin i bin kamap long kantri tupela wik i go pinis.

Praim Minista Bob Loughman i bin sanap long lain wantaim ol arapela gavman minister na ol diplomat bilong Saina long kisim dispela sut long Tunde.

Gavman bilong Saina i bin givim 20,000 dose bilong dispela veksin em Wol Helt Ogenaisesen (WHO) i bin givim tok orait long ol kantri i ken yusim.

Mista Loughman i tok ol dispela veksin bai helpim Vanuatu long givim sut long olgeta manmeri long kantri husat i laik kisim banis sut bilong COVID-19.

Tasol planti askim i kamap nau long dispela disisen bilong Mista Loughman long kisim Sinopharm veksin na i no tingting long kisim AstraZenecca em COVAX program bilong WHO i givim long ol kantri.

Oposisen MP Matai Seremaiah i tok Mista Loughman i mas tingting long rilesensip bilong Vanuatu wantaim Saina olsem na em i kisim veksin Saina i bin wokim.

Tasol em i tok tu olsem olsem Praim Minista i kisim Sinopharm veksin long mekim ol pipel i bilip long kisim dispela veksin.

"Mi ting bai gutpela sapos sampela lida i kisim dispela Sinopharm, veksin long mekim ol pipel i no ken tingting planti," Mista Seremaiah i tok.

Oposisen lida, Ralph Regenvanu i bin namba wan man long kisim AstraZeneca long taim rolaut program bilong Vanuatu i bin op tupela wik i go pinis.

Mista Seremaiah i tok em tu bai kisim veksinesen long taim dispela program i kamap long ilektoret bilong em long Luganville long mun Julai.

Em i tok planti pipel long Vanuatu i pret long kisim dispela banis sut bikos long kain kain stori i kamap long sosel midia na intanet.

Helt Minista bilong Vanuatu, Silas Bule, i tok dispela program bilong givim veksin i kamap gut long Vanuatu. Em i tok 7,000 pipel i kisim dispela banis sut pinis.

Marian Faa Pacific Beat