WANPELA meri long Skotland, UK i winim rekot we long taim em i stap laip yet, em i lukim 6-pela jeneresen bilong famili bilong em.

Mary Marshall, husat i gat 86 krismas, i gat 90 tumbuna, ol pikinini bilong ol tumbuna, na nau ol tumbuna bilong ol tumbuna bilong em i karim pikinini, inap long mak bilong 6-pela jeneresen olgeta long famili bilong em.

Dispela meri i bin karim 8-pela pikinini na nau famili bilong i winim rekot bilong UK long 6-pela jeneresen, stat long Mary yet i kam daun inap long bebi Nyla Ferguson husat i gat tripela wik tasol.

Olgeta meri long famili i bin marit na karim pikinini long taim ol i gat 18 krismas na olgeta yet i stap long Edinburgh.

Mary i bin karim 8-pela pikinini. Namba wan pikinini meri em Rose Thorburn.

Rose Thorburn, 68, i gat foapela pikinini, wanpela bilong ol em Chyrel Borthwik, 50 krismas husat i gat tripela pikinini.

Chyrel i karim Carrie Dow long 1986.

Carrie, 35, i gat foapela pikinini, wanpela bilong ol em nupela mama ya Toni-Leigh husat i gat 17 krismas.

Long 24 Me, Toni-Leigh i karim bebi Nyla Ferguson.