LONG 7 Julai long dispela yia, bai Solomon Ailan i makim 43 yia independens aniveseri, tasol las wik em i namba wan taim tru wanpela praim minista bilong Solomon Ailan i bin go lukim Tikopia ailan.

Dispela ailan i stap longwe tru long Temotu Provins bilong Solomon Ailan.

Praim Minista Manasseh Sogavare i bin go long Tikopia long wanpela polis patrol bot.

Mista Sogavare i bin go long selebresen bilong Temotu Provinsal De long las wik Tunde na bihain long dispela em i bin laik go long Tikopia na Anuta. Tasol solwara i bin raf tumas na em i go long Tikopia tasol na em i go bek long Lata stesin na bihain em i go bek long Honiara.

Freda Tuki Rotutafi, memba bilong Temotu Vatud, we i karamapim Vanikoro, Utupua, Duff, Tikopia na Anuta, i bin go wantaim Mista Sogavare. Na em i tok ol pipel bilong Tikopia i bin amamas tru long em i go tu. Em i tok ol pipel bilong Tikopia i amamas olsem wanpela praim minista bilong kantri i go lukim ol long namba wan taim tru.

Em i tok tu olsem Praim Minista Sogavare yet i lukim laip bilong ol pipel bilong Tikopia na i harim wari bilong ol. Wanpela bikpela hevi em long raun bilong sip i go long ailan bikos ol I no gat mani long baim sip na i go kam.