TUPELA lida bilong Bogenvil i askim Atonomus Bogenvil Gavman (ABG) long yusim sampela mani Nesenel Gavman i givim long stretim gut wok bilong lo na oda wantaim helt sevis long ABG. Nesenel Gavman I bin givim K40 milien long ABG.

Ol i tok dispela tupela sevis i bin bungim hevi stat long taim bilong kraisis i kam inap nau.

Dispela K40 milien em i namba wan hap bilong K100 milien em Nesenel Gavman i bin makim long wanpela bikpela miting namel long Praim Minista James Marape na ABG Presiden Ishmael Toroama long givim i go long Bogenvil.

Ol i bin holim dispela "konsaltetiv" miting long Arawa pastaim long dispela yia.

Memba bilong Saut Bogenvil na Minista bilong Infomesen, Komunikesen na Teknoloji, Timothy Masiu, i tok em i impoten long strongim ol wok bilong lukautim lo na oda.

Memba i makim ol meri long Not Bogenvil long ABG palamen, Amanda Masono i laikim gavman i yusim sampela bilong dispela mani long stretim gen ol helt sevis long Bogenvil.