INDONESIA bai lukim planti moa keis bilong COVID-19 sapos ol helt woka i no hariap long mekim wok bilong stopim dispela sik i kalap i go kam. Wanpela saveman i mekim dispela toktok bihain long moa pipel long Java na Sumatra i wok long kisim dispela sik nau. 

• Namba bilong ol keis i surik i go antap hariap tru bihain long nesenel holide we planti moa pipel i bin travel.
• Aninit long 5 pesen bilong targeted populesen i bin kisim ful veksinesen
• Indonesia i sot long ol ikwipmen bilong wokim genomic testing

Long las wik Fonde, Indonesia i bin tokaut olsem i gat 8,892 nupela COVID-19 infeksen long wanpela de. Ol i bin rekotim bikpela namba tru long 23 Februeri. Las wik namba bilong ol pipel long Indonesia husat i gat COVID-19, i bin stap long 1,885,942.

Ripot bilong coronavirus taskforce bilong kantri i soim olsem 211 pipel i bin dai long Fonde na total namba bilong ol pipel COVID-19 i kilim em inap long mak bilong 52,373.

Moa pipel long Java na Sumatra i kisim sik tripela wik bihain long holide bilong ol Islam long tambu long kaikai. Planti milien manmeri i bin raun i go i kam long ol dispela ailan. Ol i no wari long tambu gavman i bin putim long raun nabaut.

Dicky Budiman, wanpela saveman bilong wei ol sik i save kalap i go i kam (epidemiologist) bilong Griffith University long Australia, i tok Indonesia i mas was gut long abrusim ol dispela nupela kain COVID-19 strein, moa yet dispela kain ol i kolim Delta variant, na stopim long kalap i go long komyuniti.

"Sapos yumi no senisim strateji, bai yumi lukim sik i kamap bikpela moa long komyuniti na moa pipel bai dai,” em i tok.

Long Kudus, sentral Java, we ol i bringim moa helt woka, namba bilong ol COVID-19 keis i kalap i go antap long 7,594 pesen, Wiku Adisasmito bilong COVID-19 taskforce i tok.

Nius ripot i tok tu olsem spes long ol haus sik i winim pinis mak bilong 90 pesen.

Defriman Djafri, wanpela epidemiologist bilong Andalas University long Pandang, i tok long  mun Me, planti pipel tru i bin dai long Wes Sumatra.

Long Riau long Sumatra, olgeta de namba bilong ol COVID-19 keis i wok long surik i go antap na long namel bilong mun Me, namba i stap long 800 long wanpela de. Las wik ol positiv keis i bin stap long 35.8 pesen, Wildan Asfan Hasibuan, wanpela epidemiologist na provinsal taskforce edvaisa i tok.

Wildan i tok as bilong moa pipel i kisim sik em bikos long dispela nupela kain COVID-19 i wok long kalap hariap long komyuniti, olsem em i bin mekim long ol arapela kantri.

Tasol Indonesia i sot long ol ikwipmen bilong testim vairus long sekap long wanem kain variant i stap long kantri.

I gat hevi tu long testim ol pipel na tu, Indonesia i no winim yet mak we em i laik ol pipel i mas kisim ful veksinesen bilong banisim COVID-19.

Ol stadi i soim tu olsem ol keis bai winim mak bilong 1.9 milien. Dispela mak i winim tru ol arapela kantri long Esia.