LAS wik, Kwin Elizabeth II i bin bungim ol lida bilong ol strongpela kantri long wol husat  bin bung long long miting bilong  G7 summit long Cornwall, saut-wes Inglan.

Bihain long dispela em i bin go bek long Windsor Castle long lukim wanpela militeri pered bilong makim 95 yia betde selebresen bilong em.

Dispela Trooping the Colour seremoni i save kamap long London we i save gat planti ol man na meri soldia na ol pablik husat i save kamap long lukim.

Kwin Elizabeth II wantaim Duke of Kent i lukim dispela militeri seremoni bilong makim betde bilong em long Windsor Castle. (AP)

Tasol dispela bai namba tu yia nau we i no bin gat bikpela seremoni tumas i bin kamap, bikos long ol hevi bilong COVID-19.

Ol 9-pela balus bilong Royal Air Force Red Arrows i bin flai long fomesen na autim ret, wait na blu smok na ol soldia i bilas long retpela kout na putim bearskin hat long het bilong ol.

Samting olsem ol 275 sevisman na meri wantaim 70 hos i bin stap insait long dispela sereoni. Las yia, ol 85 soldia tasol i bin stap.

Ol Red Arrows balus i flai antap long Windsor Castle long dispela militeri seremoni. (AP)

Betde tru bilong Kwin em long 21 Epril, tasol em i save selebretim narapela betde gen long Jun, taim ples i no gat ren na  gutpela taim bilong wokim ol selebresen ausait.

Samting olsem 275 sevisman na meri wantaim 70 hos, i bin stap insait long dispela seremoni.(AP)