GAVMAN bilong Vanuatu i bungim bikpela hevi long konstitusen bilong en bihain long  Spika bilong Palamen i bin rausim 19 memba bilong gavman wantaim Praim Minista na Deputi bilong em olsem memba bilong Palamen.

Spika, Gracia Shadrack i rausim 11–pela gavman minista wantaim Praim Minista Bob Loughman, Deputi Praim Minista Ishmael Kalsakau, tripela deputi spika na sampela moa gavman bek bensa.

Spika i tokim palamen olsem ol 19 MP i no moa memba bilong palamen bikos ol i no bin stap long tripela miting bilong palamen.

Praim Minista Bob Loughman i traim long tokim Spika olsem ol gavman memba i bin stap long bung bilong palamen long tripela de long 1, 2, na 3 Jun, bipo long ol i lusim plua bilong palamen, tasol Spika i tok ol i mas go long kot long salensim disisen bilong em.

Mista Shadrack i tok sapos ol i lus long kot, bai i gat bai-ileksen i kamap long dispela 19 sit bilong palamen.

Em i tok sapos ol i winim kot, bai ol i ken kam bek long miting bilong palamen.