EKSEKETIV dairekta bilong wanpela NGO grup ol i kolim, Tulele Peisa, i laik Nesenel Gavman na Atonomus Gavman bilong Bogenvil (ABG), i mas givim han long resetelmen program bilong ol pipel long Carterets.

  Ursula Rakova i tok ol dispela tupela gavman i no ken pasim ai long dispela bikpela hevi bilong ol pipel.

Ms Rakova i tok, tupela gavman wantaim i mas sapotim na givim mani bilong helpim long muvim sampela pipel bilong Carterets i go long bikples Bogenvil. Ol pipel long Cartarets i wok kisim taim nau bikos solwara i wok long bagarapim ol ailan bilong ol.

Ms Rakova i tok Tulele Peisa i gat 4-pela moa hap graun long riloketim pipel bilong Carterets i go long en - em i tok dispela wok bai gohet na i no gat wanpela bai stopim.

Em i mekim dispela toktok long Tinputz long bikpela we 10-pela famili i go sindaun pinis long en. Ol i planim kakai na i wok long helpim tu ol pipel bilong ol long Carterets husat i wok long sot long kaikai nau.

Minista bilong Klaimet Senis long ABG, Raymond Masono, i bin tok pinis olsem resetelmen  em i no wanpela ansa bilong ol hevi bilong klaimet senis long Carterets.