ASOSIESEN bilong ol mama long Porgera main eria long Enga Provins,i amamas stret long nesenel gavman na Barrick Niugini Ltd i kamapim dispela Porgera Framework Agreement bilong opim main gen.

Serah Erasi, Presiden bilong Porgera Distrik Wimens Asosiesen, i tok ol 6,000 mama husat i memba bilong asosiesen na ol famili bilong ol, i bin kisim taim stret long taim Porgera main i bin pas long wanpela yia.

Las wik Praim Minista James Marape i bin go go givim dispela Porgera Framework Agreement long ol papagraun na Enga Provinsal Gavman. Mista Marape i tok, ol papagraun bilong Porgera Mine bai i no stap baksait long ol wok bilong ekstrektim na divelopim ol risos bilong ol.

Ms Erasi i tok ol meri insait long Porgera distrik i bin misaut long ol luksave long ol mani aninit long agrimen bilong las 30 yia, na tu, long dispela nupela Framework Agreement.

Em i tok bai ol i toktok strong aninit long ol konsaltesen we bai kamap olsem, ol mama bilong Porgera i mas kisim 10 pesen bilong ol sea wankain olsem long OK Tedi.

Tasol em i tok ol mama na famili bilong ol i bin kisim taim stret bihain long main i bin pas na ol i amamas long em bai op bek gen.

Aninit long dispela Porgera Framework Agreement, ol PNG Shareholders bai gat 51 pesen ekwiti na bihain long 10-pela yia bai ol i ken baim aut 49 pesen bilong Barrick.

PNG Gavman bai kontribiut 36 pesen long ol kost bilong statim gen Porgera Mine.  Tasol gavman bai no givim wanpela mani, long wanem Barrick yet bai raisim dispela mani makim gavman.