PRESIDEN bilong Sumgilbar lokal level gavman long Madang Provins, Brenden Kennedy, i tok maski ol pipel i toktok long stopim ol dispela wok, kampani i wok long go het yet long katim ol diwai long dispela distrik na klostu long Bogia distrik tu.

Mista Kennedy i tok ol toktok i kamap olsem ol papagraun i no toktok gut long wanem kain ol helpim ol bai kisim long ol diwai bilong ol.

Em i tok i hat long ol papagraun i toktok egensim kain wok, taim ol kampani i kisim tok orait long PNG Forest Authority long katim ol timba long Madang provins.

Philip Hasu husat i bilong Madang yet na em i save mekim planti awenes kempein long Madang wantaim ol papagraun. Em i tok bikpela samting em ol pipel long ples i no gat gutpela save long ol kain kontrak ol i save sainim long larim ol kampani i go katim timba.

Em i tok i gat sampela hait pasin i stap we ol kampani i save stap long wanpela provins i save go long narapela provins na katim ol diwai aninit long narapela nem, tasol em ol wankain kampani i save stilim ol diwai long kantri.

Mista Hasu i tok yet olsem planti ol namel man i save giamanim ol papagraun na kisim ol long sainim ol kontrak we ol i no gat save long en.

Na mipela i askim bekim bilong ekting menesing dairekta bilong PNG Forest Authority, Dr Ruth Turia na em i tok em bai kisim ripot long opisa long Madang pastaim long em i toktok moa long dispela hevi, tasol em i no kam bek long mipela.

Madang Gavana, Peter Yama tu i no bekim ol askim bilong mipela long toktok wantaim em.