Gavman bilong Fiji i rausim sampela ol tambu ol i bin putim long taimCOVID-19 i bin kamap bikos ol i wari long ol bisnis insait long kantri.

Ol pipel i ken dring Kava nau, na ol i mas dring long haus bilong ol wantaim ol famili memba tasol na i no ken serim kap.

Sakiusa Sorovi em i wanpela man i save salim kava long wanpela maket long Suva. Em i no amamas long dispela oda bilong gavman long .

"Nau ol i tok kava i kamapim dispela sik, tasol ol yet i bin oipim boda," Mista Sorovi i tok.

"Em i hevi bilong Gavman bikos ol i larim ol pipel bilong ol arapela kantr i gat COVID na ol i karim dispela sik i kam."

Fiji i bin pasim boda bilong en long taim COVID-19 i bin kamap bikpela long wol na i  wok long kisim ol sitisen bilong en i kam bek long kantri.

Sik i kamap nau long Fiji bihain long wanpela soldia i no bin bihainim ol stretpela pasin insait long wanpela kwarentin ples na em i kisim sik na givim i go long ol arapela lain tu

Mista Sorovi it ok gavman i mas putim strongim ol lo bilong pablik helt na i no ken sutim tok long kava tasol.

"Ol i no inap long stopim ol pipel long dring kava. Ol i stopim ol pipel long raun i go kam, na nau ol i kirap opim dua gen," em i tok.

"Ol i sutim tok long dring. Dispela tok i nogat as bilong en."

Ol ripot i tok tu olsem ol lain bilong militeri, polis ba nevi i brukim ol helt sefti lo bilong COVID-19 long taim ol i go bung long ol haus kari na dring kava

Bikpela hevi i bin kamap long las wik long taim gavman i bin rausim asisten Edukesen Minista bihain long ol midia ripot i tok e mi bin dring kava long taim bilong virtual sesen bilong palamen.

Viliame Gavoka, lida  bilong oposisen pati, Social Democratic Liberal Party, it ok ol pipel i no ken serim wanpela kap long dring kava long dispela impoten kalsa bilong ol Fiji.

Em i tok long sampela ples ol pipel i wok long bringim kap bilong ol yet i kam long dringim kava olsem na mobeta gavman i mekim dispela i kamap lo.