Pasin bilong dring kava i kamapim moa COVID-19 long Fiji

Details

HELT Dipatmen long Fiji i wari olsem pasin bilong sindaun bung na dringim kava bai inap long kamapim moa COVID-19 keis long kantri.

  • Moa long 400 pipel long Fiji i kisim COVID-19 pinis.
  • Pasin bilong dring Kava i save planti lain i kam sindaun bung na dring long wanpela  bikpela dis.
  • Dipatmen bilong helt i tingting long stopim kava.

Las wik Fiji i rekotim moa long 100 keis bilong COVID-19 we i soim olsem bihain long mun Epril, namba bilong ol pipel husat i kisim COVID-19 i wok long surik i go antap. Dispela kain COVID-19 i kamap long Fiji em i wankain olsem dispela i Delta strein em ol saintis i bin painim pastaim long India.

Gavman i pasim bikpela haus sik long Nadi na ol i pasin tupela wing bilong bikpela haus sik long Suva, bihain long ol i bin painim dispela keis bilong COVID-19 long hap.  

Ol helt opisa i bilong ol dispela lain husat i kisim sik i wok long serim kava. Helt Seketeri, James Fong i tok ol hus krai na pasin bilong bung na drin kava i wok long kamapim moa COVID-19 long kantri.

"Mipela i wok long lukim planti moa pipel i kisim dispela sik na ol it ok ol i bin bung wantaim long dring kava," Dr Fong i tok.

"Ol lain i save bung wantaim long dring kava we ol i serim wanpela kap na em i isi tru long dispela vairus i kalap long wanpela man i go long narapela."

Kava em i wanpela impoten dring long kalsa bilong ol pipel long Pasifik rijon.

Ol i memeim rop bilong kava diwai na miksim wantaim wara long wanpela bikpela dis ol  i kolim tanoa.

Ol pipel i save sindaun raunim dis na yusim wanpela liklik kap ol i wokim long sel kokonas, ol i kolim bilo long dring. Wanpela i dring pinis bai em i givim bilo i go long narapela na em gen bai pulapim kava long dispela kap na dring.

Dispela em i pasin bilong ol Fiji. Tasol nau gavman i wari na tokim ol pipel long stopim pasin bilong ol pipel i bung long dringim kava bikos long COVID-19.

"No ken serim kava dis wantaim ol arapela lain bihain long wok o long ol arapela ples, " Dr Fong i tokaut long ol pipel. 

"No ken mekim mi askim gavman long stopim kava olgeta.”