DAME Meg Taylor i pinsim olgeta wok bilong Seketeri Jeneral bilong South Pacific Forum (PIF) na em i lusim Fiji long go bek long Papua Niugini. Em i bin holim dispela wok inap long 6-pela yia.

Nupela Seketeri Jeneral bilong Forum nau em Henry Puna bilong Cook Islands.

Dame Meg i tok wok bilong PIF i karamapim planti ol praioriti eria bilong ol lida olsem sait long klaimet senis, rijonal sekyuriti, solwara boda bilong ol wan wan kantri, hevi bilonbg nuklia na bisnis na tred.

Em i tok tu olsem em i amamas long karim bikpela toktok bilong praim minista bipo bilong PNG, Sir Mekere Morauta i go long ol Pasifik lida long eria bilong politikal setelemen na long bringim ol arapela NGO i go insait long toktok na wok bilong Forum.

Tasol Dame Meg Taylor i tok em i amamas long kamap namba wan meri bilong holim dispela wok, tasol em i no amamas tumas long wanem Forum i stap 50 yia pinis na watpo i no gat wanpela meri i bin holim dispela wok.