PLANTI ol pipel bilong Shortland Islands long boda eria bilong Solomon Ailan na Atonomus Rijon ov Bogenvil i kisim pinis AstraZeneca veksinesen bilong COVID-19.

Wanpela komyuniti lida long Shortlands, John Kotaru i tok klostu olgeta pipel bilong ol i kisim namba wan sut pinis na bai ol i kisim namba tu raun bilong sut long mun Julai.

Solomon Ailan i bin kisim 24,000 AstraZeneca veksin aninit long Covax program bilong Wol Helt Ogenaisesen (WHO). Ol i givim sut long olgeta frantlain woka na olgeta pipel long boda eria wantaim Bougainville, na tu long Choiseul na Ontong Java long Malaita Outer Islands.

Bihain long ol i opim dispela veksinesen program las wik, gavman i statim rolaut wantaim dispela Sinopharm veksin bilong Saina long Honiara. Ol pipel bilong Saina na sampela pipel bilong Solomon Ailan tu i bin go kisim dispela sut.

I kam inap nau, Solomon Ailan i bin rekodim 20 keis bilong COVID-19 keis, tasol i no gat komyuniti transmisen. Gavman bilong kantri i tok dispela i soim olsem Solomon Ailan i fri long dispela sik.