Wanpela speselis bilong Vanuatu long University bilong South Pacific long Fiji i singaut long pipel bilong ol arapela Melanesian kantri husat i stap long Fiji long stap isi na bihainim ol lo bilong COVID-19 em gavman i bin putim long lukautim helt bilong olgeta pipel long kantri.

Jane Kanas i mekim dispela toktok bihain long ol ripot i soim olsem namba bilong ol pipel husat i kisim displa sik i wok long surik i go antap.

Las wik, Fiji i bin lukim 11-pela nupela keis bilong COVID-19 we i bringim total namba long wanpela de tasol long 21.

Stat long taim Fiji i lukim namba keis long Mas 2020, Fiji i bin gat 259 COVID-19 keis olgeta, 147 bilong ol i bin orait pinis, 4-pela pipel i bin dai na 108 em ol ektiv keis husat i stap long aisolesen.

Fiji i lukim namba bilong ol corona vairus keis i wok long go antap, na gavman i bin kamapim ol lo bilong daunim pasin bilong wokabaut nabaut. I gat lokdaun tu we ol pipel i save stap tasol long haus. Gavman i kamapim dispela lo long lukim olsem ol pipel i no ken raun nabaut na karim dispela sik i go kam.

Tasol ol pipel long Fiji i ting wanem stret long ol namba bilong ol keis i wok long go antap tumas? Jane Kanas wanpela speselis tisa long Universiti bilong South Pacific long Suva, i tok laip em i no isi, tasol ol i mas bihainim ol toktok na askim bilong gavman.

Serah Liki i wanpela sumatin bilong Vanuatu husat i skul long politiks long Universiti bilong South Pacific long Suva, i wari stret long laip bilong em na ol foapela pikinini bilong en.

Ol pipel bilong Papua Niugini husat i stap long Fiji i wok long bihainim ol toktok na oda gavman i putim long lukautim helt na sindaun bilong ol pipel. Jacinta Tony Barrion, fes seketeri, long embesi bilong PNG i tok ol PNG studen long University bilong South Pacific na ol narapela edukeisan institution long Fiji, i stap gut.

Long dispela taim ol sumatin bilong University bilong South Pacific i no go skul long ol klasrum, ol i save mekim ol wok bilong ol long internet o online. Tasol sampela studen i painim hevi long dispela nupela wei bilong skul long wanem ol i no gat kompiuta long yusim.