OL lain bilong Burnet Institute bilong Australia na PNG i bin mekim wanpela wok painim we i soim olsem i planti belmama i gat sik bilong ol seksueli transmitet disis (STI) long rot bilong karim pikinini.

Burnet Institute em i wanpela medikol risets institute bilong Australia. Em i bin wok wantaim ol patn bilong en long Kokopo, Is Nu Briten, long mekim dispela risets.

Ol i painim aut olsem ol belmama i gat "bikpela sans moa" bilong infeksen i kamap long rot bilong pikinini na ol arapela STI.

Namel long ol dispela sik em wanpela STI ol i kolim Mycoplasma Genitalium we ol i no bin lukim long PNG bipo.

Dispela stadi i bin karamapim 699 belmama long Is Nu Briten Provins. Ol i painim olsem 74 pesen i gat wanpela kain RTI long taim ol i go long namba wan antenatal klinik bilong ol, na 37 pesen i gat wanpela STI em marasin i ken stopim.

Tim lida bilong Burnet Institute long Kokopo, Pele Melepia, i tok dispela em bikpela wari tru bilong olgeta hap bilong Papua Niugini. Em i laik gavman i mas lukim ripot bilong ol na i mas wokim ol samting bilong stopim ol dispela sik long ol mama na bebi bilong ol.