SAMPELA pipel bilong ol Pasifik ailans kantri na ol sitisen bilong Nu Silan tu i no gat planti banis long visa bilong ol taim ol i kam long Australia, tasol helpim long sait bilong Centerlink na gavman sapot i save hat aninit long visa bilong ol.

Hevi bilong nogat wok long taim bilong COVID-19 pandemik i mekim wanpela Papua Niugini famili i bin bungim hevi long Brisbane, Australia wantaim dispela kain visa ol i gat nau.

Anne Korre em i bilong Sentral provins tasol em i gat wanpela spesel visa bilong Nu Silan we i larim em na famili bilong em long stap long Australia, taim man bilong em i bin wok long PNG.

Ms Korre i tok famili bilong em i no gat mani long baim rent na ol narapela samting taim man bilong em i bin lusim wok bilong em long PNG.