HEVI bilong traibel pait long Hailans em wanpela salens Mary Kini i bin wok hat long en inap 20 yia nau na em i kisim luksave long Nesenel Gavman long dispela wok bilong em.

Em i go pas long wanpela NGO grup ol kolim Highlands Women Human Rights Defenders na ol i stap long Simbu provins.

Ms Kini i tok em i kirap nogut tru taim em i harim olsem em i bin stap long Queens Birthday Honors lista na i kisim awot long sevis bilong em long komyuniti na strongim wok bilong ol meri.

Em i tok em i bin go insait long dispela wok bihain long papa na brata bilong em i dai long hevi bilong traibel pait taim em i bin yangpela meri yet.