KASTOM bilong pinisim sori

Details

KASTOM bilong pinisim sori (Mama') long wanpela famili memba i dai, i stap long planti
hap long PNG na Bogenvil.
Long ol lain bilong Siwai, long Southwest Bogenvil (AROB) dispela em i wanpela spesel
ivent tru na i save gat 3-pela hap long em.
Namba wan hap em hap we planti man long PNG i save long em olsem "Rausim sel" o
"Rausim Haus Krai" (mu'mu'si) na i ken  kamap samting olsem wanpela wik bihain long
ol i planim pinis man husat i bin indai.
 Namba tu hap em bikpla singsing (Ori) ol save wokim long pinisim olgeta dispela sori
na namba tri hap em "las kaikai' we i save kamap bihain tasol long ori o bikpela singsing
long givim kaikai long ol lain husat i bin wok long mekim kamap dispela singsing.
RAUSIM HAUS KRAI (Mu'Mu'si)
Bihain long ol i planim pinis  dai man ol lain wan pisin bilong em bai sindaun long ples.
Dispela em taim bilong sori (Mama').
Sampela tambu i save kamap long dispela taim em olsem;  tambu long winim kaur ,
tambu long mekim ol bikpela nois na tambu long kaikai ol kaikai ol kukim wantaim gris
bilong kokonas.
Ol famili memba tu i no inap go long ol gaden bilong ol  na mekim ol wok bisnis bilong ol
wan wan. Ol narapela lain bilong ples tu i save mekim wankain. Sapos wanpela man o
meri i brukim wanpela long ol dispela tambu, ol i ken holim em long pasin bilong ples na
ol i ken takis.
KOKONAS
Kokonas em wanpela bikpela samting long kaikai bilong ol Siwai olsem na ol i save
tambu long kaikai ol kaikai ol i kukim wantaim gris bilong kokonas long taim ol i stap
long taim bilong sori (Mama'). Olgeta narapela manmeri bilong dispela ples bai bihainim
dispela tambu long dispela taim.
Long wankain taim ol famili husat dai i kamap long ol, bai ol i wok long bungim ol pik na
ol kaikai samting  bilong kaikai long taim bilong pinisim dispela sori o mu'mu'si.
Taim ol bungim pinis hamas pik ol laik kilim long dispela taim,  ol bai toksave long taim
bilong kuk na bai ol narapela manmeri long komyuniti husat i laik kam i ken kam.
Sampela long ol tambu ol i bin putim long taim bilong sori olsem tambu long kaikai ol
kaikai ol kukim long gris bilong kokonas tu bai pinis tasol ol tambu long winim kaur na
mekim planti nois bai stap yet inap ol wokim bikpela singsing (ori) long pinisim dispela
sori.

Long makim pinis bilong tambu bilong go long gaden, ol meri bai go long gaden na
kisim sampela kaikai na long pinisim tambu long kaikai ol kaikai ol kukim wantaim gris
bilong kokonas, ol bai wokim  kawo o tamatama na kaikai wantaim olgeta manmeri
husat i kam long dispela kaikai .
 Ol tu bai givim ol hap  pik long ol manmeri husat i bin kam na krai long dai man o meri.
Dispela (mu'mu'si) i  makim pinis bilong taim bilong sori, o Rausim Haus Krai.
Taim dispela i pinis ol famili memba i ken go bek na mekim ol wok bilong ol olsem, wok
gaden, wok  bisnis na ol samting olsem. Ol narapela famili memba tu husat i bin kam
long ol narapela ples long stap wantaim ol, i ken go bek long ol ples bilong ol na mekim
wankain olsem wankain tu long ol arapela manmeri bilong dispela ples.
Sampela ol famili memba bai putim tambu long ol yet. Sampela i ken tambu long kaikai
pik, o kakaruk o wanpela kain pis o ol narapela kain abus,  na sampela i ken tambu long
katim gras bilong ol na ol samting olsem. Na ol famili memba bai no inap go long winim,
kaur, bikos dispela tambu i stap yet.
Ol tu bai putim tambu long ol man long painim pis long sampela wara o painim ol abus
samting olsem wel pik o kapul long wanpela hap bus. Ol i save putim dispela ol tambu
bai ol i pis long wara na ol  abus long bus i ken kamap planti bai ol ken kilim long taim
bilong bikpela kaikai.
Dispela tambu bai kamap tasol long ol wara na bus bilong ol lain famili yet na i no long
wara na bus bilong ol narapela klen.
BIGPELA SINGSING (Ori)
Ori em bikpela singsing i save kamap long pinisim sori long wanpela o sampela man i
bin kamap long famili. Ol bai singautim ol lain bilong ol narapela ples long kam na winim
kaur.
Dispela hap em bikpla hap tru bilong pinisim sori. Em bai kamap sampela taim bihain.
Em i ken kisim planti yia long redi long em. Sampela taim em save kisim moa 10-pela
yia.
Em i save kisim longpela taim bikos ol famili mas redi gut long sait bilong mani, na
lukautim planti pik bikos sapos ol i no lukautim planti pik bai ol mas baim ol long ol
narapela lain.
 Sampela famili tu i no gat planti famili memba na sampela ol nogat o lain i save wok
mani, olsem na ol bai laikim longpela taim long wok redi.
Bikpela singsing olsem, bai laikim moa long 20 pik. Mani mak bilong sampela pik nau
em K500 na i go inap K1,000.

Sampela taim ol  famili i laik pinisim sori bilong 2-pela o 3-pela dai wantaim long
wanpela singsing tasol.  Olsem na ol bai kisim ol pik long mak bilong hamas man o meri
i bin dai.
Long redi long dispela bikpela kaikai o ori ol bikman wantaim ol meri bilong dispela klen
na ol lain husat i marit insait long dispela klen bai bung wantaim na paitim toktok long
how kaikai  bai ran o hamas pik ol wan wan i gat na hamas moa ol mas kisim long
inapim ol laik bilong ol.
Ol tu ol bai pasim tok long husat ol ken askim long helpim ol long baim sampela pik.
Pasin bilong dinau i no wanpela pasin bilong ol Siwai olsem na i gat rot bilong askim
long helpim long narapela man long dispela kain taim na dispela em olsem man husat i
laikim helpim i mas givim samting ol kolim long toko o diposit na no ken askim nating.
Dispela toko i ken stap long mak bilong prais bilong pik man yet i laikim. Dispela em ken
K500 i go inap long K1000.
Taim dispela man i kisim dispela deposit (toko) em bai go painim na kisim wanpela pik
long mani mak em kisim tasol planti taim dispela man bai putim hap mani bilong em yet
antap long dispela na em bai kisim narapela pik long mani mak bilong K500. Dispela em
wanpela rot bilong mekim namba bilong ol pik long banis i kamap planti.
 Bihain, sapos dispela man i wok long mekim wankain kaikai, em bai askim long
wanpela pik inap long mani mak bilong K500, long dispela man husat i bin askim
pastaim.
 WOK RERE
Taim ol redim pinis olgeta tingting bilong ol long wokim dispela kaikai (ori), namba wan
samting ol bai mekim em long singaut I go long ol lain husat bai go pas long wokim ol
wok (Atu atu nopo). Dispela i ken wanpela klen o ol lain bilong wanpela ples o sapos ol
famili yet i gat planti man ol i ken mekim ol dispela wok ol yet.
Wok bilong ol dispela lain em long mekim olgeta wok redi long mekim dispela singsing
(ori) kamap gut.
Namba wan wok ol bai i mekim em long wokim wanpela hauswin (aurui). Olgeta wok
bilong mekim wantaim dispela singsing bai kamap long dispela haus, na ol bai hipim
olgeta kaikai bilong tilim long ol pipel husat bai kam long dispela haus.
Taim dispela hauswin i pinis ol bai kilim wanpela pik long makim pinis bilong dispela
wok na dispela ol lain wokman bai wokim nau banis bilong putim ol pik bilong dispela
singsing.
Taim banis i redi ol bai stat putim ol pig igo insait, stat wantaim ol pig ol lain famili yet i
makim bilong go insait long dispela singsing. Bihain long em ol bai karim ol pik ol

narapela man i baim bilong putim insait long dispela banis. Dispela i ken kisim 3-pela o
4-pela wik.
Ol narapela wok ol bai mekim em long; wokim ol basket bilong putim ol kaikai, wok
saksak, karim ol diwai bilong kuk wantaim, na rediim ol drai kokonas.
Long dispela taim tu, ol bai painim pis long ol wara ol bin putim tambu long en na kilim
kapul long hap bus ol bin pasim.  Ol pis na ol narapela abus ol kilim long wara na bus
tambu em ol bai smokim bilong kaikai bihain.
Taim olgeta pik i stap pinis long banis, ol famili husat i wok long mekim singsing bai
sindaun wantaim ol lain husat i bin baim sampela long ol pik we ol stap nau long banis
na makim de bilong singsing na tu, ol bai paitim toktok long ol samting olsem hamas ol
ples ol bai singautim long kam na winim kaur na wanem pik bai go long wanem ol ples.
DE BILONG SINGSING (ORI)
Sampela nait pastaim long dispela singsing i kamap, ol liklik lain bilong ples yet bai ol
winim kaur long dispela ples. Dispela i mak olsem tambu bilong winim kaur na mekim ol
kain nois i pinis nau.
Long de bilong singsing yet, ol lain wok man bai i bisi tru. Ol bai kirap long moning tru
long brukim na skrapim ol kokonas bilong mekim krim bilong putim long kawo o
tamatama  na ol meri bai kukim ol tapiok bilong wokim kawo o tamatama na taim em i
tan pinis ol bai karim i go long ol man bilong paitim na mekim i go long sep bilong putim
long ol basket.
Olgeta dispela basket kaikai na tamatama bai stap long haus win (aurui). Ol bai tilim i
go long olgeta grup husat bai kam long dispela singsing.
Long dispela taim tu, bai ol katim gras long ol lain famili memba husat i bin putim tambu
long katim gras bilong ol long taim bilong sori.
NAIT BILONG SINGSING
Ol bikpela singsing (ori) olsem i save kamap long nait na ol man bai singsing i go tulait.
Long de bilong singsing ol lain husat i go pas long wok bai klinim gut ples, na makim ol
hap we ol singsing grup bai sanap taim ol kam kamap na taim ol kamap bai ol soim
olgeta grup long wanem hap bai ol sanap.
Long nait taim ol wok long singsing, em wok bilong man husat i bin kisim singaut long
go kisim sampela kaikai bilong grup bilong em. Em bai kisim 10-pela basket kaukau na
10-pela basket tamatama bilong ol lain bilong em. Taim ol kaikai pinis ol i ken winim
kaur gen i go inap tulait.
Ol i save pinis long samting olsem 7 o 8 klok long moning na ba ol go long banis we ol
pik i stap na kisim pik bilong ol na ol go.

Long bik moning yet, ol lain famili husat i mekim dispela singsing bai bilas wantaim ol
samting ol sel mani (mimis) na ol bai kam raunim kaur na ol man bai luksave long ol
long bilas bilong ol olsem em ol lain famili husat i mekim dispela singsing. Ol bai
luksave long ol long bilas bilong ol na sampela ol bai karim ol.
Taim olgeta singsing grup i go bek, dispela singsing o ori bai pinis.
LAS KAIKAI
Taim dispela singsing i pinis ol lain bilong wok bai malolo tupela o tripela de na bihain ol
bai bung gen long wokim las kaikai.
Ol bai kilim ol pik ol i bin lusim long banis na sampela bai ol kaikai ol wantaim na
sampela ol bai putim long baket na givin wan wan basket long olgeta man husat i bin
wok long mekim kamap dispela singsing.
Long dispela taim tu ol famili memba husat i bin tambu long kaikai sampela kain kaikai
olsem pik o kakaruk bai ol kaikai bek ol samting ol bin tambu long em.
Taim dispela kaikai i pinis, olgeta samting long mekim wantaim dispela ori or singsing i
pinis na olgeta samting long famili  na long dispela ples i go bek nomol gen.

Komyunikesen i no moa hevi long Haisi Distrik

Details

WANPELA liklik ples, Haisi,  long Siwai Distrik, Saut Bogenvil (AROB) nau i ken kisim na salim ol toktok long olgeta hap bilong Bogenvil, PNG na olgeta hap long wold bikos ol i gat  wifi bilong ol yet.

Buswara komyuniti strongim kona bilong ol

Details

LILY Simon i ken tingim yet taim em i save slip long wanpela tent bihain long ol i rausim em
long haus bilong em long Pot Mosbi 20 yia i go pinis.

Helt ekstensen opisa kamap kopi bisnisman

Details

LAIP i gat kain kain singaut bilong em.

Yu ken plen long wokim wanpela samting o i laik kamap wanpela man o meri long sampela wok tasol sampela taim dispela bai senis.

Kamapim ol sotpela muvi bilong promotim senis

Details

OL studen bilong 9-pela Katolik sekenderi skul long Nesenel Kepital Distrik (NCD) i bin bung long namba tri media edukesen semina long wokim ol sotpela muvi bilong kamapim senis.