LILY Simon i ken tingim yet taim em i save slip long wanpela tent bihain long ol i rausim em
long haus bilong em long Pot Mosbi 20 yia i go pinis.

Ms Simon i bin stap long wanpela setelmen we ol pipel i save olsem ol polis i ken kam na
rausim ol. "Bihain long dispela mi save slip ausait, i no gat kaikai na ol pikinini i no go skul,” em i tok.
"I no bin isi long stap olsem bihain long ol i rausim mipela, bai mipela i kuk na kaikai we?
"Long taim ren i pundaun, mipela i sanapim ol tent na slip ausait."
Tasol Ms Simon i laik painim gutpela sindaun olsem na em i muv i go ausait long Pot Mosbi.
Em i stat long wokim haus bilong em long dispela bus ples we i gat bikpela graun. Bihain
long sampela yia, moa pipel i kam na sanapim haus bilong ol tu.
Bihain nau ol i givim nem Buswara long dispela komyuniti.
Komyuniti lida, Edward Bare i tok nau i gat planti tausen pipel i stap long dispela hap.

"Planti bilong ol em ol i rausim long ol arapela hap bilong Pot Mosi olsem na dispela em i
olsem las ples long Mosbi," em i tok.
"Ol pipel i kapsait i kam sindaun hia."
Ol pipel kamapim naispela komyuniti long Buswara
Ol piple husat i go sindaun long Buswara i kamapim wanpela gutpela komyuniti.
I gat wanpela praimeri skul, tripela sios na ples bung we ol lain i wokim maket na we ol PMV
i save go stop na kisim ol wokmanmeri i go long siti.

"Buswara em i no wanpela setelmen, em i wanpela komyuniti," Mista Bare i strongim poin
bilong em.
Tasol 20 yia bihain long dispela komyuniti i kamap, Ms Simon na ol arapela lain long
Buswara i kisim tok olsem ol bai mas raus long dispela graun.
Bikpela hap graun long Buswara em i bilong Nambawan Super. Dispela em i supaenuesen
fan bilong ol pablik sevan bilong PNG.
Nambawan Super i bin baim foapela bikpela hap graun long dispela eria long 1990 tasol em i
bin bungim planti salens na i no divelopim dispela ol graun.

Nambawan Super i tok bai em i sanapim wanpela bikpela sabeb long dispela hap we ol
memba bilong en na ol pipel bilong Pot Mosbi i ken baim ol haus i no dia tumas..
Em i bin putim ol edvetismen bilong rausim ol pipel long dispela hap wanpela yia i go pinis,
tasol ol Buswaara komyuniti i salensim dispela long kot.
Long mun Desemba las yia, Nambawan Super i bin winim dispela keis long Nesenel Kot na
kot i givim ol pipel 120 de long lusim dispela eria. Buswara komyuniti i tingting long
salensim dispela disisen long kot.
Nambawan Super i tok sampela lain i wok long giaman na salim ol blok long Buswara na
disisen bilong kot i mas mekim ol lain husat i laik baim graun ausait long siti na taun, i
bihainim stretpela wei.
Ms Simon i tok em i no save em bai go we sapos ol i rausim ol.
Em i wokim haus na i groim ol kaikai long kona bilong em long Buswara.

Lily Simon na ol dispela lain i senisim pes bilong dispela hap bus na kamapim wanpela
komyuniti ausait long Pot Mosbi. (ABC News: Natalie Whiting)
Em i save salim ol kumu long maket long Mosbi na kisim liklik mani long lukautim famili.
"Mi bin wanpela yangpela merri long taim mi bin kam,” em i tok.
"Nau waitgras i kamap."
Wanem samting bai kamap long ol pikinini long Buswara?

Ms Simon i tok em i bin kisim ol pikinini husat i save stap long strit na lukautim ol olsem
pikinini bilong em.
"Mi lukautim 20 pikinini," em i tok.
"Sapos ol i rausim ol dispela pikinini bai ol i go bek gen long strit."

Planti pipel long dispela liklik komyuniti tu i wari long dispela.
Samting olsem 200 pikinini i save skul long Buswara priameri skul ol i bin opim long 2016.
Prinsipel bilong skul, Paul Sukma, i tok namba bilong ol pikinini i wok long gro.
"Gavman i traim long divelopim siti na i muvim ol pipel i kam long dispela hap, olsem na
olgeta yia namba i wok long gro," em i tok.
Ol ritaia tisa i ranim dispela skul na planti bilong ol em ol volantia, skul i kisim helpim i kam
long ol sios na lokal grup, olsem na dispela i mekim isi long ol pikinini i go long skul.
"Mipela i no slim bikpela mani – liklik tasol long mekim wok olsem na ol i amamas long
sapotim mipela," em i tok.

Em tu i wari long wanem samting bai kamap sapos ol i rausim ol long Buswara.
"Mipela i wari bikos ol pikinini ai go we. Ol skul long Nesenel Kepital Distrik i pulap na i no
gat spes,"em i tok.
"I no gat narapela ples long go stap"
Samting olsem 45 pesen bilong ol pipel long Mosbi siti, i stap long ol setelmen we i no gat
plen bilong ol. Planti bilong ol i no gat sevis olsem wara na ilektrik pawa na ol rot.
Planti ol pipel husat i no stap long ol setlmen i save kisim taim bikos rent bilong haus i dia
tumas na i gat planti famili i stap wantaim long wanpela haus.
Nambawan Super i tok dispela i mekim na ol i laik wokim ol haus long Buswara we ol
manmeri inap baim na stap gut.
Tasol sapos ol i rausim ol lain long Buswara bai ol i go we?

Narapela komyuniti lida, Tony Tetor, i tok ol i plen long kisim dispela hevi i go bek long kot
na askim long rausim dispela eviksen notis long aim kot i harim apil bilong ol.
"Ol pipel [long Buswara] i stap wantaim bikpela wari," em i tok.
"Ol i no save wanem samting bai kamap.
"Bai ol i go we? I no gat narapela ples long siti we ol i ken muv i go. I no gat narapela ro
olsem na bai mipela i go long kot wantaim nupela eplikesen."
Gavana bilong Nesenel Kepital Distrik, Powes Parkop i gat wankain wari olsem ol dispela
lain.
"Mi no gat moa graun insait long siti long putim ol dispela pipel," em i tok.
Gavana i tok em i save olsem kot bai givim tok orait long Nambawan Super olsem na em i
wok long painim wei nau bilong kisim sampela graun bilong putim ol dispela pipel long
Buswara.

Em i tok Gavman i ken baim Nambawan Super long seksen bilong graun we ol pipel i ken
muv i go sindaun.
"Mipela i wok long toktok long dispela samting long pas tripela mun na klostu bai mpela i
stretim tok," em i tok.
"Olsem na mi ken tok bai i no gat eviksen."
Tasol ol pipel long Buswara i wari bai olgeta lain bilong ol i no inap stap insait long dispela
plen.

Natalie Whiting ABC PNG