Dia edita, Mi bin sori tru na krai long taim mi lukim piksa na stori bilong ol mama em sampela lain i bin kalabusim na givim pen long ol bihain long ol pipel i sutim tok long posin na sanguma pasin.

Sampela bilong ol i dai long ol bagarap ol i bin kisim long dispela taim. PNG i kamap long wanem kain mak nau? Watpo bai yumi tok PNG i wanpela Kristen kantri na yumi mekim dispela kain pasin long ol mama na susa bilong yumi? Na ol dispela MP bilong ol i stap we na i no opim maus bilong ol? Mi harim tasol maus bilong PM Marape na Polis Komisina na Gavana bilong NCD i mekim strongpela toktok egensim dispela pasin nogut. Mi no harim maus bilong MP bilong Kagua Erave na bilong Enga. Ating ol i mas go long provinsal redio na toktok stret long ol pipel bilong ol o? Palamen i mas strongim lo na rausim ol dispela lain ol i kolim glasman. Ol i save giamanim ol pipel na sutim tok bilong posin na sanguma. Ol i as tru bilong promotim dispela kriminal pasin. Ol kaunsil bilong ples tu i mas kamap ples klia na stopim dispela pasin. Nesenel gavman i tok long givim potnait pe long ol nau, orait ol i mas mekim wok bilong lukautim lo na oda long komyuniti bilong ol. Mi hop long dispela nupela yia 2022 bai yumi no inap lukim kain pasin olsem i kamap gen. Theodora Lali Taurama NCD

Rausim ol glasman