Dia Edita, Mi amamas olsem gavman i lukluk long kisim pawa saplai long Galp provins na salim i go long ol arapela hap bilong kantri.

Long 1970 samting i bin gat wanpela bikpela risets na stadi gavman i bin mekim long kisim pawa na wara saplai long Purari, Galp provins i kam olgeta long Pot Mosbi. Ol saveman na ol ensinia bilong ol ovasis kantri i bin mekim dispela wok long Wabo na ol i givim ripot long gavman. Tasol sori tru, i no bin gat wanpela samting i kamap bihain long dispela bikpela wok painim. Ol i tok bai i kost bikpela mani tumas. Tude, Pot Mosbi i wok long pilim pen bilong blakaut na wara i stop bikos i no gat gutpela stenbai saplaia bilong dispela tupela impoten komoditi. Siti i gro hariap tru na i sot long pawa na wara. NCDC i no gat wanpela long-tem plen tu bilong saplaim siti long dispela tupela samting. Dispela wara na pawa saplai i kam long Rouna i wok long sot nau na em i taim bilong painim ol arapela.

Paula Torina Bomana NCD