NUPELA yia 2022 i bringim ol gutpela tingting, promis na ol salens tu yumi laik mekim long dispela yia.

Em i nomol. Olgeta yia yumi wan wan i save putim mak long wanem kain samting yumi laik mekim na yumi traim strong long winim dispela driman. COVID-19 bai stap yet wantaim yumi. Ol pasin bilong abrusim dispela sik i mas stap strong yet long laip bilong yumi. Wasim han oltaim, karamapim pes long mask, stap longwe long ol arapela manmeri, kus i go insait long skru bilong han na kisim veksin bilong COVID-19, em ol nupela pasin bilong stap seif na daunim dispela sik. Yumi strongim dispela pasin long wan wan famili na skulim ol pikinini long bihainim ol pasin bilong mekim komyuniti i stap seif. Mun Janueri em i taim ol holide i pinis na i taim bilong taitim bung gen long wok. Namba wan bikpela wok bilong Janueri em long bungim mani bilong baim skul fi bilong ol pikinini. Gavman i tokaut olsem bai i no gat skul fi long 2022. Tasol yumi olgeta i save olsem i no gat wanpela skul i fri. Papamama i mas painim mani bilong baim skul fi, ol yunifom, ol buk pensil na arapela samting pikinini i nidim. Ol bikpela skul o teseri insitusen i no fri. Skul fi bilong ol i antap tru we planti manmeri bilong PNG i no inap long painim mani bilong baim. Sapos ol i kisim gavman skolasip em ol i laki, na ol arapela tarangu bai misaut. I gat 12-pela mun na wan wan mun i gat ol salens bilong ol yet. Wanpela bikpela samting tru long dispela yia em 2022 Nesenel Jenerel Ileksen. Faivpela yia i pinis nau na PNG bai makim gen ol nupela memba (MP) i go long Nesenel Palamen bilong kantri. I gat planti bikpela wok Ilektoral Komisin i mas mekim bipo long wok bilong ileksen i stat long mun Epril. Yumi hop ol wok redi bai mekim dispela ileksen i ran gut na olgeta manmeri husat i rejista long komon rol i ken kamap long taim bilong vot na makim husat manmeri ol i laik lukautim ilektoret bilong ol. Yumi hop tu olsem long dispela ileksen bai moa meri kendidet i resis na win. Ol meri ken kamap MP sapos yumi ol man na meri wantaim i skelim ol stretpela kendidet na givim vot long ol. Nupela laip bilong palamen bai stat long 2022 na em i sans bilong yumi long senisim pes bilong palamen wantaim ol stretpela man na meri lida wantaim. I gat planti politisen i pulap long kantri, tasol PNG i nidim ol trupela lida long kamapim ol stretpela lo bilong lukautim sindaun bilong pipel long faivpela i kam na long bihain taim tu. Las yia yumi lukim bikpela hevi bilong vailens egensim ol meri i kamap. Hevi bilong soseri akusesen riletet vailens (SARV) i kamap ples klia we ol pipel i sutim tok long ol meri na pikinini long sanguma na posin na i kilim ol. I gat wok i kamap pinis long wokim ol lo bilong stopim dispela hevi. Tasol wok i mas gohet yet na ol MP i mas sapotim strongpela lo bilong stopim dispela kain vailens long komyuniti bilong yumi. Bikpela senis i kamap long ol ples we ol pipel i go bek gen na wok long graun long kamapim mani. Dispela i wanpela gutpela mak bilong 2021 na yumi hop wok bai i strong yet long dispela nupela yia na ol yia i kam bihain long mekim graun bilong yumi i karim kaikai na lukautim yumi. PNG i laki kantri bikos ol pipel i papa bilong bikpela hap graun tru, tasol yumi no ken larim graun i slip nating na yumi sindaun wetim gavman long karim kago i kam. Yumi yet i ken kamapim senis, na senis i ken kamap sapos yumi wanbel na wok bung wantaim gavman long winim ol driman bilong kantri. Sanap strong, putim Bikpela i go pas long olgeta wok yumi laik mekim na yusim dispela save em i givim yumi long helpim ol manmeri long stretpela rot. PNG em yumi ya!