Dia edita,

Palamen i bung gen long dispela wik long paitim toktok long ol samting nesenel gavman i laik kamapim.

Mi tok olsem bikos gavman i gat moa MP na bai ol i winim ol Opsisen long taim ol i vot long sapotim program bilong gavman.

Mi laik ol MP i no ken westim taim long dispela bung bilong palamen. Taim i sot nau na i gat planti ol bikpela ajenda bilong kantri i stap yet.

P NG i nidim moa mani na sapot bilong pait egensim dispela bikpela hevi COVID-19 i wok long kamapim long helt sistem bilong yumi nau. I luk olsem namba wan taim nesenel gavman i givim mani long ol provins i redi long COVID-19, ol i bin westim dispela mani. Nau yumi lukim olsem i no gat inap bet o oksijen saplai o ol ikwipmen bilong lukautim ol manmeri i kisim COVID-19.

Tasol moa yet, mi laik wan wan MP i mas opim maus na tokim ol pipel long ilektoret bilong ol long kisim COVID-19 veksin nau. Long taim moa pipel i kisim veksin, bai PNG i gat gutpela sans long  daunim dispela sik COVID-19. Dispela sik em ol manmer i karim raun na givim i go kam long ol arapela. Yumi kisim sut bai yumi sevim laip bilong yumi yet na famili bilong yumi na ol arapela wantok.

Mi laik ol MP i mas opim maus na karim dispela toktok i go long wan wan ilektoret bilong ol. Sapos sik i bagarapim ples nau, bai ileksen bilong 2022 tu i bagarap.

Simon Silas

Gerehu

NCD