Dia edita,

Las wik ol pikinini bilong mi i baim presen long givim long ol tisa bilong ol long amamasin de bilong ol tisa.

Mi bin tingting planti long taim mi lukim dispela pasin i wok long kamap olsem wanpela regula ivent long wan wan yia.

I tru i gat wan wan tisa husat i save mekim bikpela wok tru long skulim ol pikinini long wan wan de. Na i gat ol les tisa husat i no save bisi tumas long mekim wok bilong ol. Ol i les long skulim ol pikinini bikos i gat planti pikinini long klasrum na tisa i no inap long rileks na wokim ol lesen bilong em.

Ol pikinini bilong mi i go long sios ejensi skul tasol pasin bilong sampela tisa i no soim olsem ol i mekim tru wok bilong ol. Ol i save kam leit i long taim ol i no kam bai i no gat narapela tisa i sekap long klasrum na givim wok long ol pikinini. Ol pikinini bai raun nabaut long laik o ol i go sindaun long as bilong diwai na stori i stap inap taim bilong pinis skul na go long haus. Skul edministreta i no save mekim wanpela samting long dispela rabis pasin bilong ol tisa.

Olsem na mi laik tok klia, de bilong tingim ol tisa i mas gat mining long en. No ken giamanim ol tarangu pikinini long givim presen long ol tisa husat i no save mekim wok tru insait long klasrum.

Karen Tikaru

Waigani

NCD