Dia edita,

Mi amamas long lukim moa pipel i wok long kisim dispela COVID-19 veksin nau.

Delta variant bilong COVID-19 i wok long kilim ol manmeri long Isten Hailans, NCD, Westen na Wes Sepik provins olsem na ol pipel i pret na painim dispela veksin nau.

Tasol yumi laik lukim moa pipel yet long ol arapela provins tu i mas kisim COVID-19 veksin.

Nau yet mak bilong ol pipel i kisim veksin em i olsem 2 pesen tasol long total populesen bilong kantri. Dispela namba em i no inap. Yumi mas bringim namba i kam antap moa yet long mekim ol pipel bilong PNG i seif.

Dispela COVID-19 veksin em i bilong banisim bodi bilong yu. Sapos yu kisim dispela sik, bai bodi bilong yu i strong long pait egensim dispela vairus na sik i no inap long daunim yu.

Mi sori tru long lukim bikpela bagarap tru COVID-19 i kamapim nau long Isten Hailans. Goroka haus sik i kisim taim. Ol nes na dokta i sotwin tru long lukautim ol sikman. Haus sik i sot long oksijen na mog bilong haus sik i pulap tru long bodi bilong ol manmeri husat i dai long COVID-19.

Yumi lukim dispela piksa na yumi mas opim ai na go kisim veksin nau.

Patamosa Riki

Not Waigani

NCD