OL pipel bilong Papua Niugini i wok long ai op nau long bikpela bagarap COVID-19 i ken kamapim long kantri.

Delta variant bilong COVID-19 i kamap pinis long PNG na nau e m i wok long kilim planti manmeri moa long wan wan de. Ol haus sik i pulap long sikman, ol i sot long oksijen saplai, ol i sot long bet, ol i sot long ol nes na dokta na ol i sot long ol imejensi ikwipmen. Ol lain bilong St John Ambulance i sot tu long ol embulens bilong karim ol COVID-19 sikmanmeri i go long haus sik. Long dispela wik yumi lukim ples klia piksa bilong Goroka haus sik we COVID-19 i givim bikpela salens tru long helt sistem bilong Isten Hailans Provins. Provins i putim tambu nau long ol manmeri i raun nabaut na ol lain bilong arapela provins i kam insait long Goroka. Ol i mekim olsem long traim stopim manmeri i karim COVID-19 i go long ol arapela. Gavana i wok wantaim COVID-19 komiti bilong provins na strongim wok bilong daunim sik na mekim awenes tu long ol pipel bilong em. Em i soim gutpela piksa long ol arapela provins long bihainim. Long NCD, ol memba bilong foapela ilektoret long Palamen i wok long raun na toksave long ol pipel i mas kisim COVID-19 veksin. Gavana bilong NCD i wok long toktok strong long ol pipel i mas harim tok na kisim dispela sut long banisim bodi bilong ol. Ol sios lida tu i wok long mekim awenes long veksin bilong COVID-19 na ol i singaut long ol bilipman na meri i mas kisim dispela veksin. Ol i luksave olsem planti moa pipel bai i dai bikos helt sistem bilong PNG i no inap long lukautim planti tausen manmeri. Ol i save olsem ol pipel bilong PNG i wok long harim kain kain giaman stori long dispela veksin na ol i pret long kisim. Long taim COVID-19 i wok long kilim moa manmeri long PNG, ol arapela kantri long wol i wok long opim boda bilong ol nau.  Ol i tok orait long ol manmeri husat i kisim ful veksin i ken raun i go i kam tasol wan wan kantri i putim sampela lo ol pipel i mas bihainim. Long ol kantri long Pasifik, planti bilong ol i stap long ful lokdaun yet bikos ol i pret long COVID-19. Sampela kantri olsem Samoa na Fiji i winim bikpela mak tru nau long givim COVID-19 veksin long ol pipel. Samoa i no gat wanpela COVID-19 keis yet, tasol ol i mekim bikpela kempen tru long givim COVID-19 veksin long olgeta manmeri husat inap long kisim dispela sut. Fiji tu i apim namba bilong en bikos ol turis em bikpela bisnis bilong kantri. Ol i save olsem sapos kantri bilong ol i seif bai ol inap pulim ol turis i go bek na apim wokmani bilong kantri gen. I gat ol stori bilong ol kantri olsem Indonesia na India we COVID-19 i kilim ol papamama na nau i gat planti ol pikinini husat i no gat papamama. Dispela samting i ken kamap tu long Papua Niugini sapos yumi no was gut. Gavman i putim ol lo bilong was long COVID-19 na olgeta manmeri i mas bihainim ol dispela nupela pasin. Tasol i luk olsem olgeta manmeri i no bihainim ol dispela gutpela rul bilong sevim laip bilong yumi. Yumi hop wan wan famili bai i ken luksave long bikpela helpim COVID-19 veksin i ken givim long laip bilong ol. Yumi hop ol i ken stopim ol giaman pret toktok long dispela veksin na kisim ol arapela wantok i go kisim dispela veksin. I gat moa manmeri long PNG husat i kisim dispela veksin pinis na ol i stap laip. Dispela COVID-19 veksin em i seif. Em i bilong banisim bodi. Em i bilong sevim laip. Na em i bilong lukautim yu na famili bilong yu. PNG inap long winim dispela sik nogut sapos yumi olgeta i wanbel na kisim COVID-19 veksin. I no gat wanpela mirakulo bai kamap nating na stopim COVID-19 long bagarapim PNG. Bikpela bai helpim yumi sapos yumi helpim yumi yet.