LONG las tripela wik, tupela strongpela lida bilong Papua Niugini bipo i bin dai. Ol dispela tupela lida em memba bilong Maprik bipo long Palamen, Sir Pita Lus husat i bin dai long 1 Oktoba na memba bilong Goroka na namba seven Gavana Jeneral bilong PNG, Sir Silas Atopare husat i bin dai long 16 Septemba.

Bodi bilong tupela i kam long Pot Mobi nau na bihain long nesenel gavman i givim luksave na rispek long taim bilong wari long dispela tupela lida, bai famili i kisim i go bek na planim long provins bilong ol. Long las 12-pela mun, PNG i lusim tupela Praim Minista bipo, Sir Mekere Morauta na Gren Sif Sir Michael Somare na sampela lida husat i bin makim pipel bilong ol long Palamen. Wan wan bilong ol dispela lida i makim pipel bilong ol long taim we rispek long lo na kalsa, daun pasin na strongpela Kristen velu i stiaim wok bilong ol olsem ol lida long Palamen. Tude, dispela ol gutpela pasin na bilip i no strong moa long nupela jeneresen bilong ol lida. ‘Mi pasin’ na pasin bilong paitim bros na kala bilong mani i kukim ai bilong ol na ol i paul nabaut long rot. Na long taim ol i paul, kantri na ol pipel tu i paul. Gutpela lida em i no kamap bikos long bikpela save bilong em o bikos long bikpela benk akaun bilong em. Nogat. Gutpela lida i hatwok long winim dispela luksave, bikos em i save soim stretpela pasin, lukautim sindaun bilong pipel na soim trupela Kristen pasin long olgeta wok em i save mekim. Wok bilong lida em i no isi. I gat kain kain salens bai kamap. Bai em i mas abrusim kain kain spia ol birua i tromoi long em. Em i ken winim ol dispela salens sapos em i sanap strong long bilip bilong em na sapos em i gat ol arapela stretpela manmeri husat i serim wankain bilip na pasin bilong em. PNG i wok long lukim olpela jeneresen bilong ol lida long politiks, pablik sevis na ol kampani, i wok long lusim yumi nau. Na long taim ol i go, ol i karim ol dispela gutpela pasin i go wantaim. Mobeta yumi no ken larim stretpela pasin na gutpela kwaliti bilong ol trupela lida i dai wantaim ol. Em i wok bilong yumi wan wan nau long opim ai na skruim wok bilong ol trupela lida i gohet long ol yia i kam bihain. Pasin bilong brukim lo i wok long kamap nomol long laip bilong ol pipel tude. Ol pikinini i no gat stretpela rol model long bihainim. Ol i ting politisen o loya o akaunten husat i gat bikpela haus, na bisnis na naispela kar na tupela o tripela meri, em i gutpela piksa long bihainim. Sori tru, yumi mas senisim dispela kain tingting. Ol trupela lida i winim planti yia long inapim dispela mak. Ol i putim ol pipel i go pas na ol i soim pasin bilong kamap trupela wokman bilong pipel. Pasin bilong ol tasol i mekim na long taim bilong nesenel ileksen, ol pipel i save votim ol i go bek long Palamen. Long taim ol pos bilong haus i pundaun, yumi mas painim ol strongpela pos gen long kisim ples. Wankain tu olsem ol dispela olpela lida bilong kantri. Ol i go nau na yumi mas painim nupela lida long senisim ol. Tude i gat planti ol stretpela pipel wantaim ol dispela gutpela pasin i stap long komyuniti. Nau em i taim bilong glasim na skelim kwaliti bilong ol na redi long 2022 nesenel jenerel ileksen. PNG i nidim ol stretpela na trupela lida long strongim ol pos bilong kantri na bai em i ken stap strong yet long planti yia i kam bihain.