Dia Edita, Mi lukim ol nius ripot long dispela wik olsem Dipatmen bilong Imigresen i mekim wok bilong sekap long ol ovasis lain husat i mekim bisnis bilong haus pamuk long ol lods insait long NCD.

Ol i painim planti bilong dispela lain i brukim lo bilong visa long mekim kain wok olsem. Sampela bilong ol i no gat visa long stap long PNG.

Mi amamas long dispela wok bilong Dipatmen bilong Imigresen bikos planti ol dispela lods i stap namel long ol famili haus long ol sabeb bilong NCD. Olgeta de ol teksi i save bisi tru long karim ol pasindia i go long ol dispela lods.

Olgeta manmeri long ol dispela strit i save long wanem kain bisnis i save kamap long ol dispela lods. Tasol ol i no opim maus bikos ol i save lukim ol dakglas kar wantaim ol bikman i go long sekap long lods. Papa bilong ol teksi bisnis tu i amamas bikos ol i wokim bikpela mani long karim ol kastoma i go i kam.

Gutpela wok bilong Imigresen tasol Polis na Intenel Revenu tu i mas sekap long ol PNG manmeri husat i bisnis patna bilong ol dispela lods. No ken wansait na poinim pinga long ol ovasis lain tasol.

Paul Taunai

Gordons

NCD