GAVMAN na ol pipel bilong Papua Niugini i amamas long lukim ol ovasis manmeri i kam wok bisnis long kantri. Dispela i soim olsem ol i bilip long PNG na ol i kam investim mani bilong ol long kantri.

PNG i wankain olsem ol arapela kantri long wol. Sapos man o meri i laik go wok bisnis ol i mas aplai na bihainim stretpela rot bilong kisim wok pemit na tok orait long wok bisnis. Wok pemit na visa i gat ol lo bilong en tu i stap long wanem kain bisnis ol i ken mekim. Bikpela samting em bisnis i mas bihainim stret lo bilong kantri na i no ken brukim lo. Tasol sori tumas. I gat sampela ol ovasis lain husat i luksave long asua bilong ol pipel bilong yumi na ol i kam isi tasol na kirapim ol bisnis we i brukim lo bilong PNG. Las wik, ol opisa bilong Dipatmen bilong Imigresen i mekim ol spot sekap long sampela bisnis long NCD na ol i painim olsem planti bilong ol i brukim lo. Sampela bilong ol dispela bisnis i kamap olsem ol haus pamuk. Papa bilong ol bisnis i brukim lo, sampela i no gat visa na tupela bilong ol em ol refuji. Dispela spot sekap bilong Imigresen i kamap long NCD, tasol ol arapela siti long kantri tu i askim long wankain wok painim

i mas kamap bikos i gat ol dispela kain bisnis nogut i wok long kamap long ol lods o haus pasindia. Ol dispela ovasis lain Imigresen i holim pinis i stap long han bilong lo nau. Bai ol i kisim mekimsave long han bilong kot o bai PNG i rausim wok pemit na visa bilong ol. Kantri i no nidim ol kain lain olsem. Yumi gat ol hevi bilong lo na oda na yumi no nidim moa hevi olsem.

Tasol bikpela askim i go long ol pipel bilong Papua Niugini yet. Watpo na ol bisnis we i brukim lo i wok long kamap? Watpo na ol pablik i no opim maus na putim ripot long ol polis o ol gavman dipatmen long sekap? I gat wanpela bekim tasol. Ol dispela bisnis i kamap bikos ol lain PNG i bisnis patna na i strongim ol dispela ovasis lain long ranim ol kain bisnis olsem. Ol PNG

bisnis lain i pasim tok wantaim ol teksi long karim ol kastoma i go kam long ol dispela haus. I gat ol PNG manmeri i wok long ol dispela hap na ol i luksave long wanem kain bisnis i save kamap, tasol ol i pasim maus. Nau em i taim bilong COVID-19 pandemik na planti bisnis i wok long bungim bikpela hevi tru olsem na planti lain i wok long painim ol wei bilong kisim mani. I no gat tok long dispela, bikos yumi nidim mani long helpim sindaun bilong yumi. Tasol mobeta yumi hatwok long mekim stretpela wok na kisim mani. Mani i no inap long pinis. I gat ol stretpela rot bilong painim mani. Yumi no ken larim pasin bilong korapsen na gridi pasin i pasim ai bilong yumi long painim isi mani na brukim lo bilong kantri.