DIRIMA Katolik peris long Simbu Provins i soim wanpela piksa olsem ol inap lukautim ol yet long taim nogut bilong COVID-19.

Taim ol i kisim toksave olsem Kundiawa haus sik i stat lukim sik COVID-19 ol i no wet long gavman i go toktok long ol. Nogat. Ol i kisim toksave bilong nupela pasin na putim long eksen.

Ol ripot i kam (lukim ol pes 6) i tok peris pris Pater Pita Kim SVD na ol peris kaunsil i go pas long samapim ol pes mask na tilim long ol perisina bilong ol. Ol yet i skulim ol yet long dispela sik na hau ol i ken stap sambai long dispela sik nogut em i kamap long ol.

Yes wok bilong autim na serim tok bilong God em i namba wan wok bilong ol misineri na ol pipel i hangre long harim dispela ol tok olsem na em i hat tru long ol haus lotu i pas. Pater Peter i luksave long dispela na wantaim ol pipel bilong em ol i wokbung long go het wantaim wok bilong sios na wankain taim banisim sik COVID-19.

COVID-19 em i kam pinis na bai i stap. Ol pipel i ken tok em i giaman sik o pait wantaim em o lainim long stap wantaim em olsem ol i lainim long stap wantaim ol arapela sik.

Dirima em i wanpela rurel peris long Gumine Distrik. Planti rurel pipel i tok em i sik bilong taun. Tasol pasin bilong ol pipel long raun i go i kam i ken bringim dispela sik long ol rurel ples tu. Dirima Katolik peris i luksave long dispela na ol i kisim was.

Ol i no pulim planti tok politik o kamapim pret toktok. Ol i harim tok na kisim eksen bilong banisim ol yet. Ol i kauntim hamas skul na helt senta i stap long distrik bilong ol na luksave long populesen bilong ol na kamapim tingting long hau ol inap helpim ol yet.

Kain tingting na pasin i mas stap namel long ol pipel. I nogat planti infomesen i stap long ol rurel ples tasol wanem samting ol pipel i save pinis em; dispela sik i kam olsem kus, o het pen, o fiva tasol em i kilim planti tausen manmeri pinis. Em i nupela kain sik we marasin i no bin stap taim em i stat long las yia.

Tasol nau i gat marasin na dispela marasin i stap nau long PNG. Praim Minista James Marape i tok pinis,  marasin bai i kam long ol ples tasol em i laik bilong wan wan long kisim o no ken kisim.

Planti pret toktok i kamap na planti i tok no ken kisim marasin o veksin. Sampela Kristen i tok em i sin long kisim veksin.

Tasol em i stap long wan wan long mekim disisen. Ol disisen i mas sanap antap long gutpela tingting bilong lukautim olgeta. Wanpela i ken tok nogat long veksin na bihain pundaun long sik COVID-19. I nogat planti bilong dispela ol veksin i stap long wol na PNG em i wanpela laki kantri long kisim wanpela bilong ol dispela veksin.

Olsem na em i stap long wan wan long kisim veksin nau o wet inap long narapela taim.

Na tu husat i wanbel long mekim sakrifais olsem bai ol jeneresen long bihaintaim i stap seif? Dirima peris I go pas pinis na ating i gutpela ol arapela i bihainim.

Namba bilong ol indai i kamap bikos long COVID-19 i stap long 121 nau na em i gutpela sapos olgeta i sanap na tok, nogat moa indai i mas kamap na go kisim veksin.