PLANTI taim yumi save tok, ‘sapos mi bin save’ bai mi no inap stap long dispela mak nau.

Yumi stap long wanpela taim we komyunikesen em i isi tru. Yumi gat ol niuspepa, ol redio, televisen na ol arapela edukesen midia tu i stap. Planti infomesen i stap long pablik i ken lukim na mekim disisen bilong ol yet.

Long dispela taim COVID-19 i kam stap pinis. Sampela i tok em i no trupela sik. Tasol dispela sik i helpim long kisim laip bilong sampela pinis.

Long paitim na daunim strong bilong dispela sik ol saientis i wok hat long kamapim veksin. Planti toktok i go i kam pinis long ol pipel i no ken kisim veksin tasol ol saientis na dokta i tok ol i mas kisim bilong banisim ol long ol sik.

Planti pipel long ol bikpela kantri i lainap long ol saientis i ken testim ol veksin long ol. Ol i no pret. Ol i lukim bikpela hevi i kamap long wol olgeta na ol i laik helpim long daunim. Wanem wei ol inap helpim? Ol i lainap na kisim tes sut. Ol i laikim i mas i gat wanpela veksin we i ken seivim laip. Dispela em i sakrifais na risponsibiliti.

Nau long ol kantri we ol i wokim veksin planti pipel i lainap long kisim tasol ol i sot pinis.

Bikpela tok pait i bin kamap taim ol dispela kantri i tok ol i mekim inap bilong ol pipel bilong ol yet na ol i no laik serim. Tasol ol i kisim salens long risponsibiliti bilong ol long serim wantaim ol arapela kantri tu na i no ken pasim bilong ol yet.

Long PNG em i no bin isi long kisim veksin tasol wantaim helpim bilong ol divelopmen patna yumi kisim 8,000 veksin na sampela moa.

Tasol planti pret toktok i go pas pinis na planti pipel i no laik kisim veksin. Lukluk long ol lain husat i lainap long kisim veksin long ol provins planti pipel bilong PNG i no go klostu long ples bilong kisim veksin tasol ol pipel bilong ol arapela kantri olsem ol misineri, ol dokta, ol tisa na ol arapela i lainap na kisim veksin.

Yumi pret long banisim yumi yet, olsem sampela i tok, yumi Thomas. Yumi wet na lukim pastaim. Pret bilong yumi i ken pasim yumi long kisim helpim.

Tasol bikpela hevi em sapos yumi no kisim helpim bikos narapela i tokim yumi long no ken kisim. I moa gut long yumi yet kisim infomesen na skelim gut na mekim disisen bilong yumi yet.

Olsem wanpela susa i stori, “Sapos mama bilong mi i bin save na i bin inap kisim mi go kisim polio veksin mi no inap sindaun long wilsia nau. Mi kisim sik polio taim mi gat foapela krismas.”

Sapos mi bin save olsem helt sistem bilong PNG i no strong o sapos mi bin save olsem ol arapela pipel i mekim sakrifais pinis so mi ken kisim bel isi.

Hevi i kamap pinis na pilim sori bihain em i no stret. Planti infomesen i stap pinis. Ritim, o harim gut na bihainim.

Nau yet i no gat inap PPE bilong banisim ol franlain wok manmameri. Na tu 8,000 veksin tasol i no inap long klostu 10 milien pipel bilong Papua Niugini. Ol tok i stap pinis nau long namba wan raun bilong veksin rolaut program ol i lukluk long ol franlain wok manmeri tasol.

Namba tu raun bilong veksin rolaut bai i lukluk long ol lain krismas bilong ol i antap long 45.

Planti paul tingting i stap pinis long veksin. Sapos mi save olsem em i banis bilong ol sik ating em bai i helpim.

Na sapos mi save olsem mi save wok o stap klostu long planti pipel i moa gut mi go kisim veksin.