NAMEL long taim COVID-19 i wok long pait strong na go antap yet, gavman, ol sios na ol pipel i no stap isi. Ol i go het yet long mekim ol wok bilong ol.

Las wik Praim Minista James Marape i stap long Ihu long Galp Provins na opim bikpela Spesel Ikonomik Zon projek. Long dispela ivent planti pipel i bin bung

Long ol sios maski ol sios lida i givim tok long ol Kristen long no ken bungim moa long 50 pipel long ol sios ektviti ol Kristen i no harim tok. Ol haus na ples bilong lotu i pulap yet.

Insait long ol PMV bas na ol maket pes mask em i olsem tiket bilong go insait na taim ol pipel i stap insait pinis ol i rausim gen pes mask na hangamapim olsem bilas bilong wasket.

Bikpela askim em yumi wari long laip bilong yumi? Yumi klia gut long pasin bilong abrusim COVID-19? Yumi wari long ol jeneresen bilong bihaintaim?

Ol ripot bilong COVID-19 i soim ol liklik bebi, mak long foa krismas i stat kisim COVID-19 nau. Pastaim yumi bin luksave na tok COVID-19 em sik bilong ol ris lain, o ol waitskin, o ol lain i stap long ples kol. Bihain yumi tok em sik bilong ol lapun. Ol lain long ol ples i tok em i sik bilong ol lain long ol taun na siti tasol.

Insait long Situation Ripot Namba 68 bilong COVID-19 em i soim olsem COVID-19 i kisim planti pipel krismas bilong ol em namel long 30 na 39.  Na namel long 9,952 lain i tes positiv wantaim COVID-19, ripot long Mande 12 Epril i tok i gat 2,497 ektiv keis na 7,364 i kamap orait pinis.

Long PNG nau i gat 91 ol lain i dai pinis long COVID-19. Olgeta dispela lain em krismas bilong ol i antap long 50. Namel long ol em wanpela memba bilong palamen na wanpela nesenel kot jas. Tasol dispela ol indai i no surukim ol pipel long tingting ating em i taim yumi senisim sampela pasin na bihainim nupela pasin?

Opis bilong Kontrola bilong COVID-19 Nesenel Pandemik i givim aut ol mesa pinis bilong banisim COVID-19 na streteji bilong en long aisolesen tasol husat bai i bihainim? Ol memba bilong palamen i no bihainim, ol sios i no bihainim, ol PMV bas na ol maket i no bihainim. Ol sekyuriti fos na polis husat i helpim long surukim dispela ol tok klia bilong ol mesa i no bihainim gut ol tok na kamapim birua wantaim ol pipel. Olsem na yumi olsem kantri yumi redi long senis tru?

Nau long dispela tai mating ol maining kampani, ol hotel na ol balus kampani tasol i bihainim ol mesa. Ating gavman i ken lainim sampela samting long ol?

Ating PNG i no wari long laip bilong ol pipel bilong en? Ating em i orait sapos ol liklik pikinini i dai long dispela sik? Ating yumi westim taim long wari long COVID-19 na yumi mas kisim was long TB, malaria, domestik vailens, ol indai long saspek bilong soseri na traibel pait?

Wanem tru em helt praioriti bilong PNG? Lukluk long sik we i kilim liklik lain, tasol i gat sans long rausim bikpela populesen o tingim jeneresen bilong bihaintaim na was long ol pikinini? O promotim gutpela sindaun we i no gat vailens na ol pipel i ken stap helti na fri tru?

Ol pipel i no laik harim na bihainim ol mesa bilong COVID-19. Ating gavman i ken mekim sampela disisen na lukluk long rot bilong stretim sindaun bilong pipel bilong en namel long COVID-19. Em i no ken givim wanpela tok long Pot Mosbi na go mekim narapela samting long ol arapela provins.

PNG i gat sampela bikpela hevi tru i stap we i nidim luksave na helpim bilong gavman. Em i taim gavman i kamap wantaim wanpela streteji bilong kamapim gutpela sindaun namel long COVID-19 na no ken paulim ol pipel.