PLANTI askim i kamap pinis long 2021 Nesenel Baset bilong PNG olsem em i ligel?  Em i bihainim lo? Em i bihainim stret rot long kisim wanbel bilong ol memba long Nesenel Palamen? Em i rait baset bai inapim olgeta nid bilong PNG? Em inap apim mak bilong ikonomi bilong kantri?

Ol pipel i askim tu sapos ol memba bilong ol long palamen i tingim ol tu o nogat? Ol i tingim gutpela sindaun na helt bilong mipela?

Palamen i kam bung long Tunde Novemba 13 na hariap tru em i kirap gen na i no larim toktok bilong baset i go het pastaim.

Ol i askim tu sapos Spika i gat pawa long singautim bek palamen long bung.

Na planti moa askim i kamap taim ol i lukim ol memba bilong ol i kalap i go i kam long ol kemp.

Tresera Ian Ling-Stuckey i bin tok dispela baset em i wanpela hatpela baset tru long histori bilong kantri. Tasol em i bin presentim baset long palamen taim i no gat olgeta memba long palamen na ol memba husat i stap i no holim baset buk long han na lukluk long en na toktok i go i kam long en pastaim long ol i pasim.

Dispela yia em i bin wanpela yia wantaim planti salens. PNG i kisim nupela gavman long mun Me 2020 na bikpela driman bilong dispela gavman em long kisim bek PNG.

I gat ol askim tu i kamap olsem, dispela gavman i laik kisim bek PNG long husat tru? Ating em i laik kisim bek PNG long yumi yet pastaim? Tasol ol i askim tu olsem wanem na ol seim lain husat i rausim las gavman na putim nupela gavman i bung gen na i laik rausim dispela nupela gavman?

Namba wan samting nupela gavman i bin mekim em long sakim risos divelopmen sekta insait long kantri. Askim i kamap tu olsem, ating gavman i popaia long dispela muv bilong em?

Nau long baset gavman i gat bilip em bai i pulim mani long ol risos divelopmen sekta na long wankain taim em i laikim givim strong long ol liklik pipel long groim infomol ikonomi na ol SME. Tasol baset i no putim ples klia hau em i laik helpim ol pipel.

Sampela i ting dispela baset i mekim asua na sampela impoten komyuniti sevis bai i mas katim ol sevis bilong ol long 2021. Baset i soim tu sot long helt na edukesen. Na ol pipel i tanim het na tingting olsem wanem tru dispela i kamap?

Long namel bilong dispela yia ol sios helt sevis i bin katim bek ol sevis bilong ol bikos long sot bilong mani long helpim ol mekim wok bilong lukluk long ol sikmanmeri na pikinini. St John’s Ambulens I mas katim bek ol sevis bilong em tu maski em I stap long franlain bilong stap sambai long COVID-19.

Nau em i gutpela taim tru bilong ol pipel i luksave long pasin na tingting bilong ol memba bilong ol. Tru tru ol i stap long helpim ol? Nau em i taim ol pipel i mas mekim sampela strongpela disisen long wanem kain gavman ol I laikim.