Mi laik autim tingting bilong mi long Mobail fon i kamapim planti hevi long ol famili. Mi lukim meri i saspek long man bilong em taim man i toktok long fon. Na bihain mi lukim long narapela famili man i kisim fon bilong meri bilong em na spai long ol sms i stap long fon.

Long narapela taim mi lukim wanpela mama i kisim wanpela fon kol na em i kirap lusim ol pikinini na go sindaun longwe na toktok long fon.

I no longtaim na tupela marit i pait i go i kam na tok nogut na ol pikinini i sanap na lukluk. Sampela dispela pait i save go long narapela mak na man o meri I save kisim bagarap na go long imejensi wod long haus sik.

Sampela taim wanpela meri i save ringim narapela meri na krosim na tok nogutim em nating bikos em i kisim rong namba o em i saspek nating.

Pasin bilong saspek na pasin bilong longlong long yusim fon i bringim planti hevi long ol famili. Plis sampela lain i mas stat mekim wok bilong tokaut long stopim dispela ‘fon vailens’. I mas i gat sampela fon namba i stap ples klia we ol pipel i ken ringim na ripotim ol long pasin long fon.

Valeri Kingi

Hohola

Pot Mosbi