OL pipel  bilong PNG i paul long wanem samting ol Memba bilong Palamen i bin mekim long las wik Fraide. Long taim bilong miting, ol minista na arapela memba long gavman bilong Praim Minista James Marape i kirap

lusim ples we ol i save sindaun na muv i go sindaun wantaim ol lain bilong Oposisen. Ol i mekim olsem long tokaut ol i no bilip moa long Praim Minista na i redi long salensim em long plua bilong Palamen. Orait bihain long dispela ol i adjenim Palamen i go long mun Desemba.

Olgeta lain insait long Palamen i bin paul. Ol wokmanmeri na deputi spika na lain bilong Praim Minista i kirap nogut long dispela pasin. Bihain long dispela, ol tupela grup i go stap long kona bilong ol na tokaut long plen bilong ol. Ol lain Oposisen i bin go kemp long Vanimo.

Long Fraide yet i kam inap long Mande, ol gavman minista husat i bin lusim Marape i tokaut long belpen bilong ol long Marape. Planti i sutim tok long gavman i no save harim toktok bilong ol bipo long em i mekim disisen long ol impoten wok insait long kantri.

Long Mande, spika bilong Palamen Job Pomat i tokaut olsem ol memba i no bin bihainim stret lo bilong Palamen, olsem na ol i mas kam bek long kibung long Tunde. Long dispela kibung, Praim Minista na lain bilong em i yusim dispela sans long tokaut na tokorait tu long 2021 baset. Orait ol gen i adjenim kibung bilong Palamen i go inap long 20 Epril 2021.

PNG i paul long wanem kain rot gavman bai yusim long bungim na spendim dispela K16bilien baset bilong 2021. Ol baset buk i no redi. Treseri minista i ritim tasol plen bilong gavman na ol memba i tok orait long en.

PNG politiks i senis long ol yia i kam inap nau. Kain kain pasin i save kamap long taim bilong kibung bilong Palamen na long taim bilong gavman na long taim dispela “grace period” bilong wanpela Praim Minista i pinis. Yumi skelim dispela lain pasin na yumi askim gen, wanem as tru bilong ilektim ol manmeri i go long Palamen. Ol i go long sevim intres bilong wan wan ilektoret na pipel o ol i yusim dispela wok long apim nem na wokmani bilong ol?

Mun Novemba em i taim bilong bringim baset i go long plua bilong Palamen na ol memba i ken paitim toktok pastaim na bihain ol i givim tokorait long mani plen bilong gavman. Ol lain Oposisen i gat sans tulong glasim dispela mani plen na autim tingting bilong ol long en. Tasol sori tumas, i no gat dispela kain pasin i kamap long 2021 baset bilong kantri. Yumi harim tasol long maus bilong Tresera hamas mani gavman bai spendim na hamas mani gavman i ting bai em inap long kamapim long 2021.

Palamen bai malolo nau inap long mun Epril neks yia. Bai ol i mekim wanem long dispela taim?

Praim Minista James Marape i no tokaut yet long nupela kebinet bilong em. Yumi putim yau na harim sapos em bai tokaut long dispela wik o nogat.

Tasol bikpela hevi i kamap long dispela paul pasin long Palamen las wik Fraide. Bai Oposisen wantaim Gavan i ran i go kam long kot long lukim husat i asua long ol Stending Oda bilong Palamen. I luk olsem long nau yet inap long taim ol i stretim dispela hevi, bai i no gat wanpela gutpela wok i kamap long kantri. Gavman na Oposisen bai i wok long pulim na taitim i go kam long kot.

PNG i bungim bikpela hevi bilong dispela sik COVID-19. Ikonomi bilong kantri i pundaun bikos long dispela wik. Planti kampani i rausim ol wokman na meri bikos long dispela sik. Ol samting i sot bikos i no gat mani long baim bikos long dispela sik. Dispela hevi bilong 2020 bai i skruim yet i go long narapela yia 2021. Yumi nidim olgeta lida long pasim tingting na wok wantaim long abrusim ol hevi COVID-19 i kamapim long kantri bilong yumi.

Mobeta ol lida bilong yumi i putim politiks i go long baksait na putim gutpela sindaun bilong kantri i go pas. Sapos Oposisen i laik senisim Gavman, orait em i ken soim trupela kala bilong en nau long ol pipel na kisim vot long ol pipel yet long 2022. Yumi kamap long arere bilong 2020 nau na ol i gat sans yet long winim bilip bilong ol pipel.