Dia edita,

Mi harim olsem las wik wanpela nupela kampani i askim gavman long givim K10.2 milien long wok bilong kamapim marasin bilong stopim sik COVID-19. Dispela toktok bilong ol saintis bilong yumi em i tru o nogat?

Mi askim watpo na ol i askim gavman long mani? Watpo na ol i no laik wok bung wantaim ol arapela risets ogenaisesen i stap pinis long kantri? Ten milien em i bikpela mani tumas.

PNG i sot long ol marasin na ol masin na arapela ikwipmen na ol dokta na nes na ol helt woka. Mobeta gavman i givim kain mani olsem long stretim dispela hevi insait long haus sik bilong yumi. Na ol lain i gat sik kensa i wok long wet yet long helpim bilong gavman long stretim gut Angau Haus sik we ol i ken kisim tritmen.

Yumi skelim ol dispela hevi na askim sapos gavman i mekim rait disisen long givim K10.2 milien long sapotim wanpela nupela kampani o nogat?

Mero Taunau

Boroko, NCD.