Dia Edita,

Mi harim nius bilong Gavana bilong NCD, Powes Parkop, i laik wokim wanpela skyrail long 14 Mile i go antap long Sogeri na mi tingting planti. Watpo spendim kain bikpela mani olsem long amamasim liklik lain pipel tasol?

NCD i gro hariap tru na populesen i painim pinis mak bilong 1milien pipel na i surik i go antap yet. Ol i nidim gutpela rot na transpot sistem insait long siti. Ol pipel i nidim moa pablik haus, gutpela wara na ilektrisiti saplai, ol i nidim moa spes bilong pablik semeteri. Na i gat planti moa samting i sot insait long siti.

Mobeta gavana i glasim ol dispela nid bilong siti na putim mani long stretim na lusim ting long driman long putim  skyrail. Ilektrisiti saplai i kam insait long NCD i no gutpela tumas na long taim i gat blakaut bai olsem wanem long ol lain i stap insait long dispela skyrail?

Skelim gut pastaim na putim mani i go long helpim tru ol manmeri husat i save baim takis insait long siti.

John Raisa

Gordons

NCD.