OL yangpela manmeri bilong Papua Niugini i save laik pilai spot na i gat ol feveret spot tim bilong ol. Oltaim ol i save apim nem bilong ol top pilaia bilong soka o ragbi o basketbal o weitlifting o wanem spot ol i laikim tru.

Ol i lukim ol dispela top pilaia olsem ol rol model o manmeri em ol tu i laik bihainim bikos long pasin na skil na eksampel bilong ol.

Las wiken ol planti manmeri bilong PNG i bin sindaun arere long televisen long lukim ragbi lig gren fainal namel long ol Melbourne Storms na Penrith Panthers i kamap long Sydney, Australia. Olgeta i putim ai long Justin Olam, biknem ragbi lig pilaia bilong PNG. Olam i pilai namba wan gren fainal bilong em wantaim ol Storms. Ol i laik lukim sapos i tru, Olam bai putim namba wan gol bilong ol Storms. Na tru tumas dispela driman bilong ol i kamap tru. Olam i brukim kiau na bringim tim bilong em i go pas long skoa bilong gem. Sampela lain husat i bin bet long dispela i bin amamas tru na apim nem bilong Olam moa yet.

PNG i gat nem long putim ol top ragbi pilaia bilong en long Melbourne Storms. Namba wan PNG ragbi pilaia husat i bin opim rot em Marcus Bai bilong Wes Nu Briten. Bihain long em i bin gat ol arapela moa na nau Justin Olam i karim nem bilong PNG long Melbourne Storms.

Kantri i nidim ol kain spots embeseda olsem Justin Olam na ol arapela top etlit bilong PNG. Ol i soim gutpela piksa o eksampel long ol yangpela pipel bilong tude.

Tasol ol dispela top pilaia bai toksave olsem em i bikpela hatwok tru long winim dispela mak. Bikos pilaia i mas gat disiplin, dedikesen, komitmen, loyelti long tim bilong em, na long praivet laip bilong em tu. Ol spotman na meri bilong PNG husat i go pilai ovasis, i save karim bikpela salens moa. Ol i save olsem ol i karim nem bilong kantri tu. Na sapos ol i mekim wanpela liklik asua, bai nem bilong ol i bagarap na bai ol i daunim nem bilong PNG tu. Olsem na ol i save hatwok moa long win na apim nem bilong kantri tu.

Justin Olam em i wanpela gutpela eksampel bilong wanpela spot embeseda bilong PNG. Long taim em i pilai ragbi long PNG yet, em i soim pasin bilong gutpela spotman. Long taim em i go pilai long Australia wantaim ol Melbourne Storms em i soim olsem PNG i gat ol gutpela ragbi pilaia.

Planti manmeri bilong Australia i no klia tumas long PNG, tasol ol i save olsem ragbi lig em i wanpela bikpela spot bilong kantri bilong yumi na i gat ol gutpela pilaia olsem Olam i stap hia. Ol kain pilaia olsem Olam i promotim PNG olsem wanpela gutpela ples ol pipel bilong Australia i ken kam lukluk raun long en olsem ol turis.

Yumi nidim ol kain lain olsem long apim nem bilong PNG bikos oltaim ol pipel bilong Australia i save abrusim PNG na go raun long ol arapela Pasifik kantri olsem Fiji na Vanuatu na Samoa na Tonga. Ol i save pret long kam lukluk raun long PNG.

 Spot em i wanpela wei bilong bungim ol manmeri wantaim. Ol i kam bung na pilai na lusim tingting long mekim ol pasin we i ken bringim ol long trabel na bagarapim laip bilong ol. I gat ol gutpela etlit i stap long komyuniti bilong yumi. Ol skul tu i wanpela ples bilong luksave long ol etlit na strongim ol long pilai wanem kain spot ol i laik pilai.

I gat bikpela nid long kirapim ol komyuniti spot program na skul spot program. I gat ol kain program olsem i kamap long NCD na ol arapela bikpela taun long PNG, tasol yumi sot long ol ples i stap longwe long taun. Ol wan wan provins bilong PNG i ken lukluk tu long spot olsem wanpela eria bilong strongim ol yangpela pipel na kirapim tingting bilong ol long winim driman bilong ol.

Spot i wanpela gutpela rot bilong divelopim ol manmeri bilong kantri long kamap ol gutpela sitisen husat i ken bung na pilai wantaim, na amamas long taim ol i win, na stap bel isi long taim ol i no winim mak.   Em i wanpela rot tu bilong skulim ol sapota long stap isi na i no ken kirapim pait sapos tim bilong ol i lus. Yumi lukim ol kain yangpela spot embeseda olsem Justin Olam i soim rot nau na yumi hop bai i gat planti moa ol yangpela pilaia i kam bihain.