LONG dispela wik, Praim Minista James Marape i tokaut olsem i gat moa pipel i kisim sik coronavirus o COVID-19 long NCD. Namba bilong ol nupela keis i mekim namba bilong ol pipel long PNG husat i kisim dispela sik i surik i go antap nau long 27.  Ol dispela nupela keis i stap insait long Nesenel Kepital Distrik (NCD). Em i tok ol dispela nupela keis em ol dokta na wokman bilong Sentral Laboratori bilong Pot Mosbi Jeneral Hospital we ol i save wokim ol test bilong COVID-19.

Dispela namba i stap aninit long 50 tasol em i soim olsem sik i stap insait long komyuniti na i wok long kalap i go long ol manmeri nau. Nau i taim bilong bihainim gen ol pasin bilong stap helti na abrusim dispela sik, putim mask long nus na maus, stap longwe long ol arapela, kus i go insait long skru bilong han, wasim han oltaim long sop, na sapos yu sik na kus, stap insait long haus longwe long ol narapela manmeri.

Ol dispela rul i bin stap strong long mun Mas na long taim bilong lokdaun. Tasol bihain long gavman i lusim sampela tambu bilong lokdaun, ol pipel tu i slek daun long bihainim o dispela rul. Ol skul i no moa kisim tempretsa bilong ol pikinini o putim marasin bilong wasim han bilong ol. Ol i lusim ting olgeta long bihainim dispela nupela nomol pasin bilong stap seif.

Ol stua na ol PMV na ol sios tu i no bihainim tumas ol dispela rul bilong stap seif. Ol i larim ol pipel i bihainim laik bilong ol yet. Tasol dispela bikhet pasin i mas pinis nau. Praim Minista i tokaut pinis olsem mobeta yumi olgeta i karamapim nus na maus long mask long taim yumi go aut long pablik ples. Yumi mekim olsem bai yumi no inap givim vairus i go long narapela manmeri na ol tu i no inap givim sik long yumi.

Moa long 3milien manmeri long wol i kisim COVID-19 pinis na dispela sik i kilim samting olsem 618,118 pipel pinis long wol. Dispela sik i wok long kamap bikpela gen long Australia na long Indonesia na i kilim planti manmeri na pikinini pinis. Long Indonesia i gat 89,869 keis olgeta na ol i ripotim 1,655 nupela keis na 81 nupela indai inap Tunde Julai 21. Long Australia i gat 12,428 keis olgeta na ol i ripotim 359 nupela keis na 3-pela indai long Tunde Julai 21.

PNG i laki tru olsem dispela sik i no kamapim bikpela hevi yet, tasol tude yumi harim olsem dispela sik i kamap long sampela moa pipel long NCD. Olgeta dispela 8-pela lain i helt woka. Em i soim olsem dispela sik i stap.

Sapos yumi was gut na bihainim tok bilong ol dokta, saintis na kontrola bilong COVID-19 Imejensi, bai yumi inap long daunim dispela birua.

Pot Mosbi Jeneral Hospital i pasim dua bilong en nau na bai ol i klinim haus sik bikos long sik i kamap long ol wokmanmeri bilong en. Bai haus sik i lukim ol imejensi keis, ol pikinini na ol mama i laik karim tasol. Olsem na moabeta ol pipel bilong siti i mas stap isi na lukautim gut helt bilong ol long dispela taim we haus sik i stap long lokdaun.

Long dispela wik bai gavman i toksave moa long wanem ol tambu em bai putim long stopim COVID-19 i kamap bikpela long NCD na kalap i go long ol arapela provins. Laip bilong yumi i stap long han bilong yumi wan wan. Yumi skelim gut na bihainim ol toksave long abrusim sik, lukautim laip bilong ol arapela manmeri na bai yumi stap seif.