OL manmeri long ol setelmen long Pot Mosbi Not Is bai lukim gutpela sindaun long sabeb (suburb) taim Nesenel Kapital Distrik i statim ol wok, Nesenel Kapital Distrik Gavana, Powes Parkop i tok.

Em i tok nau i taim bilong ol manmeri i rejista long blok bilong ol olsem ol i kisim luksave long gavman.

Em i tok kain sindaun i mas lukim ol senis i go wantaim ol senis i kamap long siti.

Parkop i mekim dispela tok long taim em i opim Saut Flai Fitnes Senta long Mosbi Saut Ilektoret long Koki las wik.

Em i tok moa long 50 pesen bilong manmeri long Mosbi Siti i stap long Not Is ilektoret na i gutpela long lukim ol i kisim sampela senis.

Em i askim ol manmeri olsem tingting bilong ol manmeri, laip bilong ol na lukluk bilong ol i mas gutpela we i soim olsem i gat senis long laip bilong ol.

Em i tok taim manmeri i gat gutpela senis na gutpela sindaun, ol bai save long pasin bilong rispektim wanpela na narapela.

“Planti hevi i kamap bikos sindaun bilong famili na komyuniti i no gutpela,” Parkop i tok.

“Gupela sindaun i ken kamap taim manmeri i gat gutpela tingting na sensim pasin bilong ol.

“Planti pipel bilong yumi i stap long setelmen we i nogat wara, pawa na suris sistem.

“Dispela i hatpela laip na i ken givim hevi long sait bilong helt.

“Siti bilong yumi i divelop hariap tasol ol pipel bilong yumi i no gat senis long laip bilong ol.

“Em tingting bilong gavman bilong mi long apgredim ol setelmen i go long ol sabeb olsem manmeri i ken lukim gutpela sindaun long laip bilong ol.”

Parkop i tokaut tu long NCDC bai yusim K300 milien dispela yia long apgredim rot na infrastraksa divelopmen long siti.

Ol wok divelopmen i kamap tu long Bomana, 9-Mail rot, Gerehu eriel rot, Lareva Maket na Waikele Maket na ol arapela hap.

Willie Brul i raitim