Station Cowboys em ol nupela primia long B gret resis bilong Tupias Kap long Mendi, Sauten Hailans provins.

Orchy Rex i raitim

LOKAL ragbi tim Station Cowboys long B Gret sait i winim Tupias Kap maina primia long wiken long Yaria Praimeri skul long Mendi, Sauten Hailans provins.

Cowboys i winim las faivepela gem bilong ol na sponsa bilong dispela lokal kompetisen Mark Tupia i givim maina primiasip taitel long ol.

Mista Tupia i amamas long kamap sponsa bilong displela lokal kompetisen na i tok em i laik kamapim rot long ol yangpela long pilai na divelopim talen bilong ol.

“I no olgeta yangpela manmeri bai skul na painim gutpela sindaun.

"Mi bilip olem sampela yangpela manmeri i ken pilai ragbi na kamap gutpela long dispela eria,” Tupia i tok.

Sampela bipo biknem pilaia bilong Mendi Muruks i stap long dispela tonamen na kodinetim ol gem.

Bipo Muruks pilaia Beat Embi i tok em i amamas long lukim planti yangpela pilaia i soim gutpela talen long dispela tonamen.

Em i toktok long ol yangpela i mas pilai gutpela futi na soim rispek long ol referi na gem opisal.

Em i tok ol pasin nogut tasol i save daunim gutpela gem bilong ol pilaia. Sponsa bilong tonamen i tok gren fainel bilong gem bai kamap klostu long pinis bilong dispela mun bipo long ol sumatin i go bek long skul.

Ol nok aut gem bai kamap long dispela wiken i go.